करिब सात अर्ब रुपैयाँको ब्रा लगाएर काइली जेनरले गरिन् डेब्यु, मूल्यलाई लिएर बहस

रियालिटी टेलिभिजन स्टार काइली जेनरले ५० मिलियन अमेरिकी डलर (करिब सात अर्ब ५९ करोड ७९ लाख रुपैयाँ) मूल्यको ब्रा लगाएर भिक्टोरियाज सिक्रेट फेसन शोमा डेब्यु गरेकी छन् । उनको यो प्रस्तुतिलाई लिएर मिश्रित प्रतिक्रिया आइरहेको छ ।

मेकअप उद्योगकी चर्चित हस्ती जेनरले आइतबार लन्जरी ब्रान्ड भिक्टोरियाज सिक्रेटको वार्षिक फेसन शोमा सबैको ध्यान खिचिन् ।  डिजाइनरका अनुसार उनले १८ क्यारेट सुन र चार हजार ४१० वटा हिरा जडित चर्चित ‘फ्यान्टेसी ब्रा’ लगाएकी थिइन् ।

फ्यान्टेसी ब्रा वर्षौंदेखि यस शोको प्रमुख आकर्षण रहँदै आएको छ । यो ब्रा लगाउने अवसरलाई छनोटमा परेकी मोडलका लागि सम्मान र करियरको महत्त्वपूर्ण उपलब्धिका रूपमा हेरिन्छ ।

२९ वर्षीया कार्दसियन परिवारकी सदस्य जेनरलाई यो ब्रा लगाउन छनोट गरिएकोमा केही प्रशंसक खुसी भएका छन् । तर, अनुभवी सुपरमोडललाई यस्तो अवसर नदिएको भन्दै धेरैले ब्रान्डको आलोचना गरेका छन् । सोसल मिडिया तथा मार्केटिङ विज्ञ जोएल मार्लिनारसनका अनुसार, यो प्रस्तुति योजनाबद्ध रूपमा आयोजना गरिएको थियो । यसले ‘मोडलिङ र सोसल मिडियाको भविष्य’ का लागि यसको अर्थ के हुन्छ भन्ने विषयमा व्यापक बहस जन्माएको छ ।

जोएलले बीबीसी न्यूजबीटसँग भने, ‘काइलीले निश्चित रूपमा सेलिब्रिटीको नयाँ युगको प्रतिनिधित्व गर्छिन् । अहिले ब्रान्डहरूले परम्परागत मोडलको परिभाषामा को फिट हुन्छ भन्नेभन्दा पनि कसले सबैभन्दा धेरै मानिसको ध्यान खिच्न सक्छ भन्ने कुरालाई प्राथमिकता दिइरहेका छन् ।’

उनका अनुसार, युवा दर्शकहरू जेनरसँग परिचित छन् । उनीहरू सोसल मिडियाका साथै कार्दसियन दिदीबहिनीसँगको उनको रियालिटी शो हेर्दै हुर्किएका छन् ।

तर, दर्शकको एउटा समूहले भने फेसनको प्रतिष्ठित ‘नाओमी क्याम्पबेल युग’ सम्झने उनको भनाइ छ । उनीहरूले जेनरलाई यस्तो अवसर दिनुलाई परम्परागत मोडलिङ क्षेत्रप्रतिको विश्वासघातका रूपमा समेत लिन सक्छन् । जोएलका अनुसार, ‘यो मार्केटिङको नयाँ युगको प्रतिनिधित्व हो । विशेषगरी भिक्टोरियाज सिक्रेटजस्ता पुरानो विरासत बोकेका ब्रान्डहरू जोखिम लिन चाहँदैनन् ।’

‘उनीहरू मानिसको ध्यान खिच्न, चर्चामा आउन र निरन्तर दर्शक जुटाउन सक्ने व्यक्तिलाई ल्याउन चाहन्छन् । भिक्टोरियाज सिक्रेटले ठ्याक्कै यही गरेको छ ।’

भिक्टोरियाज सिक्रेटको इन्स्टाग्राम पेजमा सार्वजनिक गरिएको जेनरको भिडियोमा पनि मिश्रित प्रतिक्रिया देखिएका छन् । केही प्रशंसकले उनको आकर्षक प्रस्तुतिको प्रशंसा गरेका छन् भने अन्यले यसलाई ‘वास्तविक मोडलहरूको अपमान’ भनेका छन् । प्रतिभाशाली मोडलहरूले भरिएको क्षेत्रमा जेनरलाई नै किन छनोट गरियो भन्ने प्रश्नसमेत उठाइएको छ ।

एक प्रयोगकर्ताले शो ‘प्रतिष्ठित ग्ल्यामरबाट इन्फ्लुएन्सरहरूको तमासामा परिणत भएको’ टिप्पणी गरेका छन् । उनका अनुसार, सोसल मिडियाको प्रभाव र समावेशी देखिने देखावटी प्रयासले वास्तविक मोडलिङ प्रतिभा, शालीनता र र्‍याम्पमा प्रस्तुत हुने क्षमतालाई पछाडि पारेको छ ।

भिक्टोरियाज सिक्रेटका प्रमुख क्रिएटिभ अफिसर एडम सेलम्यानले भोगसँग कुरा गर्दै जेनरलाई उनको ‘सांस्कृतिक प्रभाव’ का कारण छनोट गरिएको बताएका छन् । उनले भने, ‘काइली फेसन, संस्कृति, टेलिभिजन र यी सबैभन्दा परको क्षेत्रमा समेत प्रभाव राख्छिन् । यो शो निकै ठूलो छ । वास्तवमा यो मनोरञ्जन हो र मलाई लाग्छ, उनी यसका लागि उत्कृष्ट छनोट हुन् ।’

ब्रिटिस मोडल समर नेस्बेथले पनि जेनरलाई छनोट गर्नुको पछाडि युवा प्रशंसकसँग जोडिइरहने भिक्टोरियाज सिक्रेटको प्रयास रहेको बताएकी छन् । न्युयोर्क फेसन विकमा र्‍याम्पमा हिँड्ने २५ वर्षीया समरले न्यूजबीटसँग भनिन्, ‘उनी प्रभावशाली व्यक्तित्व हुन् र उनीसँग ठूलो शक्ति छ । हामी सोसल मिडियाको युगमा बाँचिरहेका छौँ ।’

सन् २०१८ मा कम दर्शक र आलोचनाका कारण भिक्टोरियाज सिक्रेटको फेसन शो बन्द गरिएको थियो । उक्त शो लैङ्गिक विभेदलाई बढावा दिने, पुरानो सोचमा आधारित र विविधताको कमी भएको भन्दै आलोचित बनेको थियो ।

सन् २०२४ मा ‘सबै महिलाको उत्सव मनाउने’ प्रतिबद्धतासहित शो पुनः सुरु गरिएको थियो । त्यस क्रममा प्लस(साइज मोडल एश्ले ग्राहमसहित विविध पृष्ठभूमिका मोडलहरूलाई समावेश गरिएको थियो ।

यस वर्षको फ्यान्टेसी ब्रा गहना ब्रान्ड ज्याकोब एन्ड कम्पनीसँगको सहकार्यमा तयार पारिएको हो । ब्रान्डका अनुसार, यो अहिलेसम्मकै सबैभन्दा महँगो ब्रा हो । यसलाई बनाउन १५ जना कलाकारले एक हजार घण्टाभन्दा बढी समय लगाएका थिए ।

तर, मोडल समर नेस्बेथ भने यति महँगो ब्रालाई दिइएको प्राथमिकताले समाजको वास्तविक अवस्थाप्रतिको बेवास्ता झल्काउने बताउँछिन् ।

उनले भनिन्, ‘मानिसहरूले खाना खान पाइरहेका छैनन् । कतिपयले आफ्नै घरको बिजुलीको बिलसमेत तिर्न सकिरहेका छैनन् ।’

उनका अनुसार, समाजले आफ्नो ध्यान कहाँ केन्द्रित गरिरहेको छ र पैसा कहाँ खर्च गरिरहेको छ भन्ने विषयमा गम्भीर बहस हुन आवश्यक छ ।

को हुन् काइली जेनर 

काइली जेनर अमेरिकी रियालिटी टेलिभिजन स्टार, मोडल तथा सौन्दर्य सामग्री व्यवसायी हुन् । उनी चर्चित कार्दसियन–जेनर परिवारकी सदस्य हुन् । सामाजिक सञ्जालमा उनको ठूलो प्रभाव छ ।

उनी विशेषगरी आफ्नो मेकअप ब्रान्ड काइली कस्मेटिक्स का कारण चर्चित छिन् । लिप किटबाट सुरु भएको उनको व्यवसायले उनलाई युवा उमेरमै अर्बौँ डलरको सम्पत्ति भएकी चर्चित व्यवसायीका रूपमा स्थापित गर्‍यो ।

बिबिसीबाट