Comments Add Comment

राज्य व्यवस्था समितिको बैठक स्थगित, मन्त्री पण्डित आधा घण्टा कुरेर फर्किए

Photo Credit : अनलाइनखबर फाइल

१९ कात्तिक, काठमाडौं । राज्य व्यवस्था तथा सुशासन समितिको बैठक सांसदहरुको ‘कोरम’ नपुगेर स्थगित भएको छ । मन्त्री लालबाबु पण्डित आधा घण्टा कुरेर समितिको बैठक कक्षबाट बाहिरिए ।

संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकको मस्यौदा प्रतिवेदनमा छलफल गर्न मंगलबार बिहान ११ बजे बैठक बोलाइएको थियो । तर, कर्मचारीहरु समयमै आउने, तर सांसदहरु समयमा नआउने सधैंको जस्तो समस्या मंगलबारको बैठकमा पनि देखियो ।

बैठक बस्न नसकेपछि संघीय मामिला तथा सामान्य प्रशासन मन्त्री लालबाबु पण्डित, मन्त्रालयका सचिव यादव कोइरालासहितका सांसदहरु फर्किएका छन् । बैठक कक्षबाट बाहिरिँदै मन्त्रालयका सचिव कोइरालाले भने, ‘माननीयहरु आउनु भएन, दुर्भाग्य हामी निस्कनु पर्‍यो ।’

चाडपर्वको लामो बिदापछि बोलाइएको समितिको बैठकमा मन्त्री र सांसदहरुले करिब आधा घण्टासम्म कुरेका थिए ।

राज्य व्यवस्था तथा सुशासन समिति २५ सदस्यीय छ । बैठक बस्न कम्तिमा ५१ प्रतिशत सदस्यहरुको उपस्थित हुनुपर्छ ।

बैठकमा समिति सभापति शशी श्रेष्ठ, पम्फा भुसाल, जनार्दन शर्मा, अमरेस कुमार सिंह, डिला संग्रौलामात्र उपस्थित थिए । सांसदद्वय नवराज सिलवाल र प्रेम सुवाल भने बैठक स्थगित भइसकेपछि आइपुगेका थिए ।

मंगलबार नै बोलाइएको अर्थ समितिको बैठक पनि कोरम नपुगेर स्थगित भएको छ ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment