२४ कात्तिक, काठमाडौं । प्रदेशसभा सदस्यका लागि बाग्लुङ २ ‘ख’ मा हुने उपचुनावमा शेरमान घर्तीको बागी उम्मेवादरी फिर्ता गराउने नेपाल कम्युनिस्ट पार्टी (नेकपा)को प्रयास असफल भएको छ ।
बाग्लुङमा नेकपाले राष्ट्रिय जनमोर्चालाई समर्थन गरेको छ । र, उसले खिमविक्रम शाहीले उम्मेदवारी दिएका छन् । तर नेकपाका नेता घर्तीले बागी उम्मेदवारी दिए ।
उम्मेदवारी दर्तासँगै नेकपा नेताहरुले घर्तीको उम्मेदवारी फिर्ता गराउने प्रयास थालेका थिए । आइतबार ढोरपाटन नगरपालिकाका मेयर देवकुमार नेपालीको पहलमा उनलाई होलिकप्टरमा राखेर सदरमुकामसम्म ल्याइएको थियो ।
तर घर्तीले उम्मेदवारी फिर्ता लिएनन् ।
जिल्ला निर्वाचन कार्यालयले आइतबार विहान १० बजेदेखि १ बजेसम्म उम्मेदवारी फिर्ता लिने समय तोकेको थियो । तर उम्मेदवारी फिर्ताका लागि कुनै पनि निवेदन नपरेको कार्यालयले जनाएको छ ।