सेनाको सुविधा लिएर जापानमा अध्ययन, फर्किएर अन्यत्र काम !

सैनिक अदालतले सुनायो ६ महिना कैद सजाय

अनलाइनखबर

२०७६ कात्तिक २५ गते २०:०२

२५ कात्तिक, काठमाडौं । नेपाली सेनामा रहेकै कारण प्राप्त भएको अध्ययन छात्रवृत्ति लिएर भागेको अभियोगमा प्राविधिक सेनानी रामचन्द्र तिवारी कारबाहीमा परेका छन् ।

उनलाई समरी जनरल सैनिक अदालतले ६ महिना कैद र भविष्यमा सरकारी सेवाका लागि अयोग्न नठहरिने गरी सेवाबाट हटाउने निर्णय गरेको सैनिक प्रवक्ता विज्ञानदेव पाण्डेले बताए ।

उनका अनुसार तिवारी १८ चैत २०७३ मा जापानमा दुई वर्षे अवधिको ‘पोस्ट डक्टोरियल’ तहमा अध्ययनका लागि वेतलवी विदामा गएका थिए । तर, अध्ययन पश्चात १८ चैत २०७५ मा हाजिर हुनुपर्नेमा नभइ आफू खुशी भगौडा भएकाले सैनिक ऐन, २०६३ बमोजिक कारबाही गरिएको सेनाले जनाएको छ ।

उनीमाथि सेनाबाट प्राप्त हुने सेवा सुविधा तथा सहुलियत लिइसके पश्चात आफ्नो अनुकुल हुने किसिमको जिम्मेवारी नपाएको भनी सैनिक संस्थालाई आरोप लगाएर अन्यत्र काम गरेको अभियोग थियो ।

पछिल्लो समय उनी थापाथली इञ्जिनियरिङ कलेजमा विभागीय स्वीकृतिविना व्यक्तिगत रिसर्च सुपरभाइजरको रुपमा कार्यरत् रहेको सेनाले जनाएको छ ।

साथै, २५ कात्तिकदेखि कलेजमा प्राध्यापकको रुपमा स्थायी नियुक्ति लिएर भगौडा र अनुशासन तथा आचरण सम्बन्धी कसूर समेत गरेको भनेर दोषी ठहर गरिएको सैनिक सूचना तथा जनसम्पर्क निर्देशनालयले जनाएको छ ।

तिवारी ८ भदौमा पक्राउ परेका थिए ।