१८ मंसिर, काठमाडौं । धरान उपहानगरपालिका प्रमुखका लागि भएको उपचुनाव हारेको दुई दिनपछि नेपाल कम्युनिस्ट पार्टी (नेकपा) को उपमहानर कमिटीले संसदीय दललाई निर्देशन दियो, ‘तत्काल करका दर घटाऊ ।

निर्वाचनका क्रममा जनताको घरदैलोमा जाँदा करबारे धेरै गुनासो र असन्तुष्टी पाइएकाले आर्थिक वर्ष २०७६/७७ का लागि उपमहानगरले लागू गरेको करको दर पुनरावलोकन गर्नुपर्ने नेकपा धरान निर्वाचन परिचालन कमिटीको निश्कर्ष छ । करको दर तत्काल घटाउन उपमहानगर संसदीय दललाई निर्देशन दिइएको संयोजक रमेश बस्नेतद्वारा जारी विज्ञप्तिमा उल्लेख छ ।

चुनाव भइसकेपछि नेकपाले किन करको दर घटाउन निर्देशन दियो त ? नेकपा नेता विजय राईका अनुसार अहिले वडा तहबाटै चुनावी हारको समीक्षा चलिरहेको छ । यसमा सबैको निष्कर्ष छ, मेयरको चुनाव हार्नुको प्रमुख कारण कर नै हो ।

उनले अनलाइनखबरसँग भने, ‘अहिले हामी समीक्षाकै क्रममा छौं । तर चुनावी घरदैलोको क्रममा कर वृद्धि भएको धेरै मतदाताले उठाउनु भएको थियो र, मेयरको चुनाव हार्नुको प्रमुख कारण मध्ये एक कर नै हो भन्ने हाम्रो निश्कर्ष छ ।’

चुनाव अगाडि नै यो बुझ्न नसक्नु आफूहरुको कमजोरी भएको नेकपाका नेताहरुले बताएका छन् । धरानको मेयरका लागि भएको उपनिर्वाचनमा नेकपाका उम्मेदवार प्रकाश राईलाई पराजित गर्दै नेपाली कांग्रेसका तिलक राई निर्वाचित भएका थिए ।

यो पनि पढ्नुहोस धरानको ‘लालकिल्ला’ तोड्ने तिलक राई : तेस्रो प्रयासमा सफल

यो पनि पढ्नुहोस ‘रेड एरियामा कांग्रेसले जितेको हैन, कम्युनिस्टले हारेको

यो पनि पढ्नुहोस धरानको पराजयबाट नेकपाले के सिक्न सक्छ ?