२३ मंसिर, काठमाडौं । भारतीय न्यायविद् एवं राजनीतिज्ञ डा. भिमराव अम्वेडकरको नामबाट स्थापित अवार्ड नेपाली सञ्चारकर्मीले प्राप्त गरेकी छन् ।
अम्बेडकर अवार्ड २०१९ बाट सञ्चारकर्मी आरती लम्साल सम्मानित भएकी हुन् । भारतको राजधानी नयाँ दिल्लीमा आयोजित समारोहमा भारतीय अकादमीले डा. अम्बेडकर कलाश्री अवार्डबाट लम्साललाई सम्मान गरेको हो ।
जातीय विभेदको अन्त्य र महिला सशक्तिकरणमा योगदान पुर्याएको भन्दै उनलाई सम्मान गरिएको जनाएको छ ।
जातीय विभेदविरूद्ध अन्तरजातिय विवाह गरेकी लम्सालले पछिल्लो समय विभेदविरूद्धको अभियान समेत चलाइरहेकी छन् ।
कार्यक्रमा डा अम्बेडकर एक्सिलेन्सी सर्भिस अवार्डबाट सामाजिक अभियन्ता बिमला गौचन सम्मानित भइन् ।
अग्रज समाजसेवी गौचन एकल महिला समूह म्याग्दीकी अध्यक्ष हुन् ।
यसैगरी समाजसेवीहरू सुशीला कट्टेल गैरे र राजकुमार सुनार पनि सम्मानित भएको नेपाल अकादमीका अध्यक्ष ठाकुरचन्द्र गहतराजले जानकारी दिए ।
भारतका केन्द्रिय सामाजिक न्याय मन्त्री एवं राज्य सभा सांसद डा. सत्यनारायण जाटियाले अवार्ड वितरण गरेका थिए ।
भारत, नेपाल लगायत दक्षिण एसियाका सञ्चार, मानव अधिकार, सामाजिक र साहित्यको क्षेत्रमा योगदान पर्याउने व्यक्तिलाई संस्थाले प्रत्येक बर्ष अम्बेडकर अवार्डबाट सम्मान गर्दै आएको छ ।