२३ मंसिर, काठमाडौं । शिक्षा, विज्ञान तथा प्रविधि मन्त्रालयले नेपाल इन्जिनियरिङ कलेजको नयाँ संचालक समिति गठन गरेको छ । यससँगै कलेज सञ्चालक समूहबाट लम्बोदर न्यौपाने समूह बाहिरिएको छ ।
शिक्षामन्त्री गिरिराजमणि पोखरेलले अदालतबाट आउने निर्णयलाई मान्ने गरी हाललाई संसदीय समितिको सिफारिसअनुसार कलेजलाई स्थानीय सरकारको प्रत्यक्ष निगरानीमा सञ्चालन गर्ने निर्णय गरेका हुन् ।
चाँगुनारायण नगरपालिकाका प्रमुखको अध्यक्षमा गठित नौं सदस्यीय सञ्चालक समितिमा पोखरा विश्वविद्यालयका प्रतिनिधिलगायत छन् । यो कलेज पोखरा विश्वविद्यालयसँग समन्वय गरी नगरपालिकाले गर्नेछ ।
इन्जिनियरिङको पढाइमा अब्बल यो कलेजमा पछिल्लो समय सञ्चालकहरुबीच विवाद चर्किएको थियो । कलेजको सम्पत्ति हत्याउन लम्बोदर न्यौपाने र अर्को समूहबीच विवाद मिलाउने नाममा अख्तियार दुरुपयोग अनुसन्धान आयोगका तत्कालीन आयुक्त राजनारायण पाठकले घुस समेत लिएका थिए ।
