अमेरिकी कम्पनी एप्पलका लागि समग्रमा बितेको वर्ष सन् २०१९ सुखद् नै रह्यो ।
वर्षको सुरुवात निरासाजनक रहेतापनि उत्तरार्धमा धमाकेदार व्यापार गर्न सफल रहँदै एप्पलले सन् २०१९ को सुखद अन्त्य गर्न सफल भयो ।
तथापि सिएनबिसीको रिपोर्ट अनुसार सन् २०१९ मा कम्पनीले सन् २०१८ मा जस्तो आफ्नो बित्तिय लक्ष्य पूरा गर्न सकेन । एप्पलको समग्र वार्षिक आम्दानीको अंकले कम्पनीका सिइओको वार्षिक तलबमा पनि प्रभाव पारेको छ । रिपोर्ट अनुसार सन् २०१८ को तुलनामा सन् २०१९ मा एप्पल सिइओ टिम कुकको आम्दानी घटेको छ ।
सन् २०१९ मा कुकले एप्पल कम्पनीबाट १२ करोड ५० लाख अमेरिकी डलर आम्दानी गरेका छन् । त्यसमध्ये उनको वार्षिक तलब ३० लाख डलर हो । त्यो तलब अघिल्लो वर्षकै जत्ति भएपनि उनको बोनस चाहीँ घटेर ७६ लाख ७० हजार डलरमा झरेको छ । जुन सन् २०१८ मा १ करोड २० लाख डलर थियो ।
अन्य प्रविधि कम्पनीका सिइओहरुले जस्तै कुकले पनि एप्पलको शेयरबाट मनग्गे आम्दानी गरेका छन् । सन् २०१९ मा टिम कुकले कम्पनीको शेयरबाट ११ करोड ३५ लाख डलर आम्दानी गरेका छन् ।
सन् २०१८ को तुलनामा सन् २०१९ मा टिम कुकको कमाई समग्रमा ८ प्रतिशतले घटेको छ । सन् २०१८ मा उनले १३ करोड ६० लाख डलर कमाएकोमा सन् २०१९ मा साढे १२ करोड मात्र कमाउन सकेका हुन् ।
सन् २०१९ मा एप्पलले आफ्ना उत्पादनको बिक्रिबाट कुल २ खर्ब ५६ अर्ब डलर भन्दा धेरै आम्दानी गरेको छ भने कुल सञ्चालन आय ६० अर्ब डलर रहेको छ । तथापि यो तथ्याङ्क कम्पनीको बित्तिय लक्ष्यभन्दा कम भएकाले टिम कुक र एप्पलका अन्य कर्मचारीहरुको वार्षिक बोनसमा गिरावट आएको हो ।
एजेन्सी
