सार्वजनिक पहिलो गीत ‘तिम्रो घरको वरिपरी’ले युटुबमा ५० लाख भ्यूज बटुलेपछि चलचित्र ‘म यस्तो गीत गाउँछु २’को निर्माणपक्षले दोश्रो गीत ‘दुःखको काँडा’ सार्वजनिक गरेको छ । यो गीतले प्रेमीले प्रेमिकाप्रति देखाएको मायाको आशक्तीलाई देखाएको छ । अर्जुन पोखरेलको संगीत, देवल भण्डारीको शब्द रहेको गीतमा सनिष श्रेष्ठले स्वर दिएका छन् ।
यो गीतको अडियो पावरफूल छ । यस्तै, गीत अनुसार भिडियोलाई पनि बलियो बनाइएको छ । रामजी लामिछानेको कोरियोग्राफी रहेको यो गीतको भिडियोलाई सौरभ लामाले खिचेका हुन् ।
गीतको कोरियोग्राफी पनि उत्कृष्ट छ । रामजी र उनको टिमले भिडियो निर्माण गर्न निकै मिहिनेत गरेको छ भने चलचित्रका निर्माताद्धय सुदर्शन थापा र पूजा शर्माले पनि भिडियो निर्माणमा कुनै कञ्जुस्याँई गरेका छैनन् ।
चलचित्रका निर्देशक सुदर्शन थापा हुन् । थापाले चलचित्रमा गीत छनोटमा पनि खुबै ध्यान दिने गरेका छन् । यसपटक पनि उनी यो कुरामा सफल देखिएका छन् ।
चलचित्रको गीतको भिडियोमा मुख्य कलाकारद्धय नायक पल शाह र नायिका पूजा शर्मालाई फिचरिङ गरिएको छ । पूजा र पलको केमेष्ट्री पहिलो गीतमा जस्तै यसमा पनि जमेको छ । सांगीतिक लभ स्टोरी कथामा बनेको यो चलचित्रले सुखद व्यापार गर्ने अपेक्षा गरिएको छ ।
फागुण २३ गतेबाट रिलिज हुने यो चलचित्रमा जन्म जय र साम्पाङ राई सह–निर्माताको रुपमा छन् ।
