अहिले गाईको बथान खुला चरनमा छाड्ने चाल-चलन हरायो । न फराकिलो खर्क छ, न वथानका वथान गाईबस्तु नै । कुनैबेला यस्तो थियो, जतिबेला गोठालाहरु सुरिलो भाका हाल्दै खुला खर्कमा गाईवस्तु चराउँथे । सालको पात बजाउथे । गीत बनपाखामा गुञ्जन्थ्यो । अब यो एकादेशको कुरा भयो ।
ऊबेलाका भाका र परिवेशलाई टपक्कै टिपेर कमल भुसाल ‘चञ्चल’ले गीत गाएका छन् । गीतको संगीत र शब्द उनकै हो । स्वरमा कमललाई साथ दिएकी छिन् कृष्णा परियारले । कमलका अनुसार उक्त गीतको भाका पितापूर्खाका पालमा प्रचलनमा थियो । गीतको बोल छ, ‘गाईलाई चराउँदै ।’
कमलले उक्त गीतको म्युजिक भिडियो पनि तयार गरेका छन् । म्युजिक भिडियोको निर्देशन शिभान पोखरेलले गरेका हुन् । भिडियोमा कमल भुसाल, शाया भण्डारी, चित्रमाया श्रेष्ठ, सरु विष्ट, रुपा भुसाल, विक्रम सेन, भेषराज खनाल आदिले अभिनय गरेका छन् ।
