२७ माघ, काठमाडौं । रुकुम (पूर्व) का विभिन्न ग्रामीण क्षेत्रमा अझै ढिके नुन प्रयोग हुने गरेको छ ।
साल्ट ट्रेडिङ कर्पोरशनद्वारा वितरित आयोडिनयुक्त नुनले स्वास्थ्यलाई फाइदा पुग्ने भएपनि जिल्लाका ग्रामीण क्षेत्रमा ढिके नुन प्रयोग भइरहेको छ ।
सिस्ने गाउँपालिका–१, २, ४, भूमे र पुथाउत्तरगंगा गाउँपालिकाका अधिकांश गाउँमा ढिकैनुन प्रयोग गर्नेको सङ्ख्या अझै नघटेको बताइएको छ । पुथाउत्तरगंगा गाउँपालिकामा घोडाबाटै बोराका बोरा ढिके नुन ढुवानी हुने गरेको छ ।
सस्तो र सजिलो भएकाले आफूहरुले ढिकेनुन प्रयोग गर्दै आएको भूमे गाउँपालिका–२ का सुजन घर्ती मगरले बताए । बजारमा आयोडिनयुक्त नुन पाइने गर्दछ । ढिके नुनभन्दा महँगो पर्ने र स्वादमा पनि फरक हुने भएकाले आयोडिनयुक्त नुनको प्रयोग नगरेको उनले जानकारी दिए । ढिके नुनको प्रतिकिलो २० रुपैयाँ र आयोडिनयुक्त नुन रु ३० पर्ने बताइएको छ ।
‘आयोडिनयुक्त नुनको प्रयोग गर्नुपर्छ,’ भन्ने चेतनाको अभावले ढिके नुनको प्रयोग गर्न नछाडेका सिस्ने गाउँपालिका–५ का प्रकाश मगरले बताए । सरकारले ‘दुई बालबालिकाको चिह्न अङ्कित आयोडिनयुक्त नुनको प्रयोग गरौँ’ भनेपनि यहाँका जनतामा अझै चेतनाको कमी रहेको पाइएको छ ।
