जो आमा-बुबा कामकाजी छन् र आफ्नो धेरै समय काममा नै व्यस्त हुन्छन्, त्यस्ता आमा-बुबाले आफ्ना बच्चासंग पर्याप्त समय बिताउन पाउँदैनन् भन्ने कुरा एकदम सही हो ।
बिहान ट्राफिकको सामना गर्दै अफिस पुग्नु पर्ने बाध्यता र साँझ थाकेर घर आउनु पर्ने । त्यस्तो व्यस्तताबीच पनि आफ्नो बच्चासंग धेरै समय बिताउने चाहना हरेक आमा-बुबाको हुन्छ । तर जब हामी थाकेर घर पुग्छौं, प्रायः बच्चाहरुको सुत्ने समय भैसक्छ ।
अभिभावकत्वका साथै आफ्नो अफिसको जिम्मेवारी निर्वाह गर्न अति नै कठिन हुन्छ । हरेक अभिभावकले यसलाई व्यवस्थापन गर्ने पूर्ण कोशिश गरेका हुन्छन् । हाम्रो जीवनमा उपलब्ध स्क्रिनको बढ्दो प्रयोगका कारणहरुले आफ्नो परिवारलाई समय दिनु झन् कठिन हुँदै गएको छ । फोन, ट्याबलेट, टेलिभिजन, कम्यूटर, ल्यापटप र विभिन्न प्रकारका स्क्रिन हाम्रो जीवनको महत्वपूर्ण अंग बनिसकेका छन् ।
अहिले त्यस्तो समय आएको छ, जहाँ बच्चाहरुसंग रमाउनु भन्दा उनीहरुको तस्वीर लिन हामी व्यस्त हुन्छौं । यस्तो कुराले बच्चाहरु खुशी हुँदैनन् । बच्चाहरु खुशी नभएपछि आमा-बुबा पनि खुशी हुन सक्दैनन् । यदि तपाईं आफ्ना बच्चालाई खुशी बनाउन चाहनु हुन्छ भने पहिला आफ्नो स्क्रिन टाइमलाई कम गर्नु पर्छ, जसका कारण तपाईं आफ्नो बच्चाहरुसंग क्वालिटी टाइम बिताउन सक्नुहोस् । त्यसैले आज हामीले तपाईंलाई व्यस्तताका बीचमा पनि कसरी आफ्ना बच्चाहरुसंग धेरै समय बिताउने भन्ने बारेमा केही जानकारी लिएर आएका छौ ।
बिहान ५ देखि ७ बजेसम्म
प्रायः परिवार विहान उठनासाथ पत्रिका पढ्न थाल्छन् । परिवारका साथ समय बिताउँछन् । यदि तपाईंको परिवारमा पनि यस्तो चलन छ भने यो अति नै राम्रो कुरा हो । बच्चालाई विहान उठाउनु, अंगालोमा बाँध्नु र बिहानै आफुसंग समय बिताउनु धेरै राम्रो कुरा हो । यस्तो हुँदा उनीहरु संग-संगै तपाईंको दिनको पनि राम्रो शुरुवात हुन्छ ।
यस प्रकार तपाईंले फेसबुकमा अन्य साथी-भाइहरुको पोस्टहरु हेरेर विहानको समय बिताउनु भन्दा आफ्नो परिवारसंग बिताएका हरेक मिनेटहरुका कारण विहान रमाइलो भएर वित्छ । सामाजिक सञ्जालको माध्यमबाट संसारभरी के भइरहेको छ भन्ने कुरा थाहा पाउनु भन्दा आफ्नो बच्चाको जिन्दगीमा के भैरहेको छ भन्ने कुरा थाहा पाउन सक्नु हुन्छ ।
साँझ ५.३० देखि ७ बजेसम्म
यो समयमा सकेसम्म फोनको प्रयोग गर्नु हुँदैन । यो समयमा आफ्नो बच्चासंग खेल्नु होस्, उनीहरुलाई नयाँ कुराका लागि मोटीभेट गर्नुहोस् । यो समयमा आफ्नो बच्चाको विकास कस्तो हुँदैछ, उ कति ठुलो हुँदैछ भन्ने कुरालाई नियाल्नु पर्छ । दिनभरीको समय बाहिरी काममा व्यस्त हुने महिलाहरुलाई साँझमा समय निकाल्न कति कठिन हुन्छ भन्ने कुरा सबैलाई थाहा नै छ । तर पनि आफ्नो बच्चासंग बिताएको केवल १५ मिनेटले पनि तपाईं र बच्चाको सम्बन्धलाई बलियो बनाउन सक्छ ।
साँझ ७.३० देखि राती ९ बजेसम्म
सम्भव भएसम्म सबै परिवार संगै खाना खानु पर्छ । आमा-बुबा मध्ये कोहि एक बच्चाले खाना खाँदा संगै हुन्छन् । यो समयमा हामी आफ्ना बच्चासंग दिन भरी उसले गरेको गतिविधिहरुका बारेमा जानकारी लिने गर्छौं ।
जस्तै बच्चाले आज के के गर्यो, के खायो, स्कुलमा के भयो, स्कुलमा नयाँ के हुँदैछ, उसको नयाँ साथी को हो, साथीसंग के खेल्यो जस्ता कुराको बारेमा कुराकानी गर्छौं । खाना खाएपछि र सुत्नु अगाडि सधैं बच्चालाई कथा सुनाउनु पर्छ । यसरी बच्चासंग बिताएका समयले साधारण परिर्वतन हुनसक्छ । तर, यसरी तपाईंले आफ्नो बच्चासंग क्वालिटी समय बिताउन सक्नु हुन्छ । जुन तपाईं र तपाईंको बच्चाहरुको सम्बन्ध बलियो हुन्छ ।
