८ फागुन, काठमाडौं । कमिसनसम्बन्धी लेनदेन प्रकरणमा मुछिएका निवर्तमान सञ्चार तथा सूचना प्रविधिमन्त्री गोकुल बास्कोटालाई कानुनी कारबाही हुनुपर्ने माग राख्दै नेपाल विद्यार्थी संघ(नेविसंघ)ले काठमाडौंको प्रदर्शनीमार्गमा प्रदर्शन गरेको छ ।
प्रदर्शनको क्रममा प्रहरीसँग झडप हुँदा नेविसंघका अध्यक्ष राजीव ढुंगानासहित १० जना घाइते भएको नेविसंघले जनाएको छ ।
बास्टकोटालाई अनुसन्धानको दायरामा ल्याई कडा भन्दा कडा कारबाही गर्नका लागि दबाव दिन गरिएको शान्तिपूर्ण प्रदर्शनमा प्रहरीले दमन गरेको ढुंगानाले अनलाइनखबरलाई बताए । घाइतेहरुको काठमाडौंस्थित मोडल अस्पतालमा उपचार भइरहेको नेविसंघले जनाएको छ
नेविसंघको शान्तिपूर्ण विरोध प्रदर्शनमा प्रहरीले दमन गरेको भन्दै नेपाली कांग्रेसले एक प्रेस विज्ञप्ती जारी गर्दै घटनाको निन्दा र भत्र्सना गरेको छ ।
शान्तिपूर्ण रुपमा विरोध प्रदर्शन गर्न पाउने नागरिकको नैसर्गिक अधिकारमाथि वर्तमान सरकारले ठाडो हस्तक्षेप गरेको भन्दै कांग्रेसले यस घटनाले सरकारको अधिनायकवादी र सर्वसत्तावादी चरित्र उदाङ्गो भएको जनाएको छ ।
