चलचित्र रिलिज अगाडि नै थोरै मात्र चलचित्रका गीत छन्, जसले एक करोड भ्यूज युटुबमा पाएका छन् । यसैले, चलचित्रको गीतले एक करोड भ्यूज पाउँदा निर्माणपक्ष खुशी हुनु स्वभाविक नै हो ।
प्रदर्शन मिति स्थगित गरेको चलचित्र ‘म यस्तो गीत गाउँछु २’को निर्माण टिमलाई भने यो चलचित्रमा समावेश ‘तिम्रो घरको वरिपरी’ले खुशी दिएको छ । यो गीतले युटुबमा १ करोड भ्यूज बटुलेको छ । सामाजिक संजालमा समेत निकै हिट भएको यो गीतलाई करिब २ लाख लाइक समेत मिलेको छ । यस्तै, १४ हजार भन्दा बढीले गीतलाई लिएर प्रतिक्रिया दिएका छन् । सार्वजनिक भएको २ महिनामा यो गीतले करोड भ्यूज पाएको हो ।
अर्जुन पोखरेलको शब्द तथा संगीतमा तयार भएको यो गीतमा सोनम तोप्देन र अस्मिता अधिकारीको स्वर छ । गीतको भिडियोमा चलचित्रका मुख्य कलाकार नायिका पूजा शर्मा र नायक पल शाहलाई फिचरिङ गरिएको छ । रामजी लामिछानेको कोरियोग्राफी रहेको गीतमा सौरभ लामाको छायांकन छ ।
सुदर्शन थापाले यो चलचित्रको निर्माण तथा निर्देशन गरेका हुन् ।
