Comments Add Comment
कोरोना रोकथामसम्बन्धी उच्चस्तरीय समिति :

‘भारत सहमत नभए एकतर्फी रुपमा नाका बन्द गरौं’

८ चैत, काठमाडौं । कोरोना भाइरस रोकथामसम्बन्धी उच्चस्तरीय समितिमा एकतर्फी रुपमै भए पनि भारतीय सीमा नाका बन्द गर्नु आवाज उठेको छ ।

नेपालले सीमा नाका बन्द गर्न भारतसँग प्रस्ताव गरे पनि उसले अहिलेसम्म ठोस जवाफ दिएको छैन । सीमा नाकाहरुमा भने काम तथा अध्ययनका लागि भारत गएका नेपालीका साथै भारतीय नागरिक समेत आउने क्रम ह्वात्तै बढेको छ ।

उच्चस्तरीय समितिको शनिबार साँझ बसेको बैठकमा मन्त्रीहरुले नै भारतसँग सीमा नाका बन्द नगर्दा खोजिम बढेको बताएका छन् । स्रोतका अनुसार बहुसंख्यक मन्त्रीहरुले भारत सहमत भए सहमतिकै आधारमा र नभए एकतर्फी रुपमा भए पनि सीमा नाका बन्द गर्नुपर्नेमा मन्त्रीहरुले जोड दिएका छन् ।

एक मन्त्रीले भने, ‘भारतीय सीमा नाकाहरु यसरी नै खुला राख्ने हो भने अन्तराष्ट्रिय उडानहरु रोकेको अर्थ हुँदैन । र, संक्रमणको जोखिम पनि कायमै रहन्छ ।’

बैठकमा परराष्ट्रमन्त्री प्रदीप ज्ञवालीले आफूले भारतीय समकक्षी एस जयशंकरसँग कुराकानी गरेको तर अहिलेसम्म ठोस जवाफ नआएको जानकारी गराएका छन् ।

तर, मन्त्रीहरुले भने आवश्यक परे प्रधानमन्त्री केपी शर्मा ओलीले भारतीय समकक्षी नरेन्द्र मोदीसँग सम्वाद गर्नुपर्नेमा जोड दिएका छन् । स्रोतले भन्यो, हाम्रो अहिले पनि जोड सहमतिमा नै सीमा बन्द गरौं भन्ने हो । होइन, सहमति हुँदैन भने २४ वा ४८ घन्टा दिएर लक गरौं भन्ने धेरैको जोड थियो ।’

सरकारले नेपाल आउने सबै अन्तराष्ट्रिय उडानमा भने शनिबार मध्यरातबाट प्रतिबन्ध लगाएको छ ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment