९ चैत, जनकपुरधाम । कोरोना भाइरस (कोभिड-१९)को त्रासलाई मध्यनजर गर्दै प्रदेश २ मा १८५ बेडको आइसोलेसन वार्ड तयार गरिएको छ । प्रदेशका मुख्य–मुख्य अस्पतालमा आइसोलेसन बेड तयार गरिएको प्रदेश स्वास्थ्य निर्देशनालयले जनाएको छ ।
सबैभन्दा बढी धनुषाको रमदैयास्थित जानकी मेडिकल शिक्षण अस्पतालमा ६० बेडको आइसोलेसन वार्ड तयार गरिएको छ । जानकी मेडिकलकै सिटी अस्पतालमा २० बेडको तयार गरिएको छ भने जनकपुरधामस्थित प्रादेशिक अस्पतालमा ५ बेडको आइसोलेसन तयार गरिएको स्वास्थ्य निर्देशनालयका वरिष्ठ अधिकृत विजय झाले जानकारी दिए ।
उनका अनुसार वीरगञ्जस्थित नेशनल मेडिकल कलेजमा ५० बेडको, नारायणी उपक्षेत्रीय अस्पताल र सप्तरी सदरमुकाम राजविराजस्थित गजेन्द्रनारायण सिंह सगरमाथा अञ्चल अस्पतालमा १० बेडको आइसोलेसन तयार भइसकेको छ ।
सप्तरीको रायपुरस्थित यूनिक अस्पतालमा १० बेडको, सिराहाको लहानस्थित सप्तऋषि अस्पतालमा ५ बेडको आइसोलेसन तयार भएको छ । बारा अस्पतालमा पनि १५ बेडको आइसोलेसन बेड तयार भएको झाले बताए ।
थर्मल गनको अभाव
प्रदेश २ को आठै जिल्लाका ३० भन्दा बढी ठाउँमा हेल्थ डेस्क स्थापना गरिएको छ । यद्यपि केही हेल्थ डेस्कमा मात्रै थर्मल गनको व्यवस्था छ । वरिष्ठ अधिकृत झा हरेक हेल्थ डेस्कमा थर्मल गन हुनुपर्ने बताए ।
झाका अनुसार वीरगञ्ज महानगरपालिकाले दुई वटा थर्मल गन आफैं खरीद गरी प्रयोग गरिरहेका छन् । जिल्ला स्वास्थ्य कार्यालय सप्तरीले १० वटा, सिराहाले ६ वटा थर्मल गन खरीद गरेको जानकारी आफूले पाएको उनले बताए ।
यस्तै, धनुषाको जटही नाकामा एउटा र महोत्तरीको भिठामोड नाकामा दुई वटा थर्मल गन राखेर जाँच हुँदै आएको छ । धनुषाको खजुरी नाकामा एउटा आवश्यक भएको उनले बताए ।
क्वारेन्टाइनको थालियो तयारी
शंकास्पद व्यक्तिलाई पहिला क्वारेन्टाइनमा लगेर राख्ने गरिन्छ । रिपोर्ट पोजेटिभ आएमा आइसेलोसनमा लगेर उपचार गरिन्छ । प्रदेश २ मा आइसोलेशन तयार भएपनि क्वारेन्टाइन हालसम्म निर्माण गरिएको छैन् । यसका निम्ति तयारी भने गरिसकिएको छ ।
धनुषाको जनकपुरधामस्थित बन्द रहेको मणीपाल शिक्षण अस्पताललाई क्वारेन्टाइन बनाइने भएको छ । जनकधपुरधाम उप महानगरपालिकाका मेयर लालकिशोर साहले यो अस्पतालमा ५० बेडको क्वारेन्टाइन बनाइने जानकारी दिए । उनका अनुसार झ्याल नरहेको यो अस्पतालका भवनमा झ्याल बनाउने, सरसफाई गर्ने काम सुरु गरिसकिएको छ ।
सप्तरी सदरमुकाम राजविराजमा भने बन्द रहेको साइकृष्णा मेडिकल कलेजमा क्वारेन्टाइन बनाइने भएको छ । यसका निम्ति सरोकारवालाहरुले शनिबार साइकृष्णा मेडिकल कलेजको अनुगमन गरेका छन् । लामो समयदेखि बन्द रहेको यो अस्पतालमा सरसफाई गरेर ५० बेडको क्वारेन्टाइन सञ्चालनमा ल्याइनेछ ।
वीरगञ्जमा पनि क्वारेन्टाइन बनाउने तयारी थालिएको छ । वीरगञ्ज १६ स्थित नेपाल आयुर्वेद मेडिकल कलेज एण्ड टिचिङ्ग हस्पिटलमा ५० बेडको क्वारेन्टाइन बनाउन सरोकारबालाहरु तयार भएका छन् ।
‘हामी पूर्वपश्चिम राजमार्ग अन्तर्गत प्रदेशको कम्तीमा पाँच ठाउँमा पनि क्वारेन्टाइन स्थापना गर्ने मनसाय बनाएका छौं’ स्वास्थ्य निर्देशनालयका अधिकृत झाले भने, “यसका निम्ति दातृ निकायहरुसँग आग्रह गरेका छौं ।”