१० चैत, काठमाडौं । कोरोना संक्रमणको त्रासका कारण काठमाडौंको कालीमाटी तरकारी बजारमा ग्राहक घटेका छन् ।
उपत्यका सुनसान बनेपछि व्यापारी तथा ग्राहकहरु कालीमाटी तरकारी बजारमा फाटफुट मात्र पुगेका छन् ।
आइतबारको तुलनामा सोमबार थोरै व्यापारी मात्र तरकारी किन्न आएका कालीमाटी फलफूल तथा तरकारी बजार विकास समितिका सूचना अधिकारी विनय श्रेष्ठले बताए ।
उनले भने, ‘कोनोराको डरले सर्वसाधरणले उपत्यका छाडेका छन् । तरकारी थोरै मात्र बिक्री हुन थालेपछि व्यापारीहरु तरकारी लिन आउन कमी भएको हो ।’
सोमबारमात्रै कालीमाटी बजारमा ५ सय टन तरकारी आएको छ । आइतबार भने ८ सय टन तरकारी आएको थियो । व्यापारी नआएपछि तरकारी कालिमाटीमै थन्किन थालेको छ ।
चाबहिलका तरकारी व्यापारी रमेश उप्रेती तरकारी बिक्री हुनै छाडेकाले आफूले पनि किन्न छाडेको बताउँछन् । ‘हिजो अस्ति यहाँ तरकारी किन्नेको भीड थियो बजार सुनसान भइसक्यो । मान्छे आउन छोडिसक्यो । भएको तरकारी पनि बिक्री नभएर बिग्रेला भन्ने डर छ’ उनले भने ।
कोरोना भाइरसको त्रासका कारण ब्यापारीहरु पनि तरकारी लिन जान डराएका छन् ।
