२१ चैत, काठमाडौं । सरकारले लकडाउनको समयमा सरकारी आयोजनाका टेण्डरको म्याद थप्न र होल्ड गर्न निर्देशन जारी गरेको छ । नेपाली सेनाले भने लकडाउनकै बेला काठमाडौँ तराई फास्ट ट्रयाक परियोजनाको डिजाइन तथा निर्माण सुपरीवेक्षणका लागि परामर्शदातालाई लेटर अफ इन्टेन्ट (एलओआई) दिएको छ ।
फास्ट ट्राक परियोजनाको डिजाइन तथा निर्माण सुपरीवेक्षणका लागि परामर्शदाता छनोट गर्न नेपाली सेनाले लकडाउनअघि नै प्रस्ताव आह्वान गरेको थियो । अन्तर्राष्ट्रिय परामर्शहरूदातासँग आशय पत्र माग गरेर ‘फाइनान्सियल ओपनिङ’का लागि पहिल्यै योग्य भइसकेका परामर्शदातालाई आह्वान गरिसकेको अवस्था थियो ।
सेनाले दुईपटकसम्म अन्तर्राष्ट्रिय परामर्शका लागि गरिएको प्रस्ताव आह्वान खारेजसमेत गरिसकेको थियो । तर, परियोजनाको डिजाइन र निर्माण सुपरीवेक्षणका लागि परामर्शदाता टुङ्ग्याउने नेपाली सेनाको तेस्रो प्रयास लकडाउनको समयमा आएर सम्पन्न भएको छ ।
नेपाली सेनाले परियोजनाको डिजाइन र निर्माण सुपरीवेक्षण परामर्श दाताका लागि छ वटा कम्पनीलाई विस्तृत प्रस्ताव पेस गर्न आह्वान गरेको थियो–
१. एमएस युसिन इन्जिनियरिङ कोअपरेसन कोरिया जेभी, कोरिया एक्सप्रेसवे कोअपरेसन र प्युङ्ग्वा इन्जिनियरिङ कन्सल्ट्यान्ट्स कोरिया समेत ।
२. एमएस दसन कन्सल्ट्यान्ट्स कोरिया जेभी, राइट्स इन्डिया लिमिटेड समेत ।
३. एमएस इप्तिसा स्पेन जेभी, सुसुङ इन्जिनियरिङ कोरिया समेत ।
४. एमएस मेनहार्ड सिङ्गापुर जेभी, क्योङदोङ इन्जिनियरिङ र केसीआई कोरिया समेत ।
५.एमएस एसएमइसी इन्टरन्यासनल कोरिया जेभी, दोङसुङ इन्जिनियरिङ कोरिया र कोरिया इन्जिनियरिङ कन्सल्ट्यान्ट्स कोरिया समेत ।
६. एमएस चाइना रेलवे ।
तर, यी ६ वटा कम्पनीहरुमध्ये चाइना रेल्वे कम्पनीको रुची परियोजनाको निर्माणतर्फको ठेक्कामा देखिएकाले भएकाले परामर्शदाताको भूमिकाबाट आफैँ फिर्ता भएको र विस्तृत प्रस्ताव पेस नगरेको स्रोतले बतायो ।
बाँकी पाँच कम्पनीमध्ये दुई कम्पनीलाई जंगी अड्डाले फाइनान्सियल ओपनिङका लागि बोलायो–
१. एमएस युसिन इन्जिनियरिङ कोअपरेसन कोरिया जेभी, कोरिया एक्सप्रेसवे कोअपरेसन र प्युङ्ग्वा इन्जिनियरिङ कन्सल्ट्यान्ट्स कोरिया समेत ।
२. एमएस मेनहार्ड सिङ्गापुर जेभी, क्योङदोङ इन्जिनियरिङ र केसिआई कोरिया समेत ।
फाइनान्सियल ओपनिङमा युसिन कम्पनीले समायोजित अन्तिम अंक ९१.६३ र मेनहार्ड ८९.४३ अंक प्राप्त गरे । युसिनले पाएको वित्तीय अंक ९६.५४ थियो भने मेनहार्डले १०० अंक पायो । त्यसैगरी युसिनले प्राविधि अंक ९१.०१ र मेनहार्डले ८८.२५ अंक पायो ।
विशेषज्ञ शुल्कतर्फ युसिनले भन्दा मेनहार्ड सिङ्गापुरले ८ करोड ३४ लाख ३४ हजार ३९१ नेपाली रुपैयाँ अर्थात, ३२ लाख ५३ हजार ७४१ अमेरिकी डलर कममा प्रस्ताव गरेको थियो ।
नेपाली सेनाले लकडाउनकै बेला मंंगलबार दिउँसो ठेक्का दिने आशयको लेटर अफ इन्टेन्ट (एलओआई) युसिन जेभीलाई प्रदान गर्याे ।
कोभिड १९ का कारण सार्वजनिक खरिद अनुगमन कार्यालय र हाल निर्माणाधीन अन्य ठूला परियोजनाहरू बन्द भएको अवस्थामा यसरी हठातमा आशय पत्र जारी गरिएको भन्दै प्रतिस्पर्धी कम्पनी असन्तुष्ट देखिएको छ ।
जब कि सार्वजनिक खरिद अनुगमन कार्यालयले त्यसको अघिल्लो दिनमात्रै आफ्नो वेबसाइटमा एक सूचना जारी गर्दै सबै सार्वजनिक निकायलाई आह्वान गरिएका बोलपत्र पेस गर्ने समय सीमा लकडाउनभरि लम्ब्याउन निर्देशन दिएको थियो ।
सिङ्गो मुलुक नै कोभिड १९ का कारण लकडाउनमा भएको र यातायात आवत–जावत बन्द रहेका बेला यस्तो जोखिमपूर्ण परिस्थितिमा कम्पनीका प्रतिनिधिलाई सम्झौताबारे छलफल गर्ने बैठकमा भाग लिन बोलाइएको भन्दै प्रतिस्पर्धी कम्पनीले असन्तुष्टि जनाएको छ ।
परियोजनाको समय क्रम
आशय पत्र माग– अक्टोबर ४, २०१९
आशय पत्र पेस– नोभेम्बर ३, २०१९ (दिउँसो १ बजे)
सर्टलिस्ट प्रकाशन–नोभेम्बर २७, २०१९
प्रस्ताव आह्वान– डिसेम्बर ३, २०१९
प्रस्ताव पेस–जनवरी १७, २०२० (दिउँसो २ बजे)
फाइनान्सियल ओपनिङको सूचना :– मार्च १६, २०२०
फाइनान्सियल ओपनिङ : मार्च ३१, २०२० (दिउँसो २ बजे)
आशय पत्र जारी : मार्च ३१, २०२०
