८ वैशाख, काठमाडौं । बेलायतले ‘ब्लड प्लाज्मा’बाट कोरोना भाइरस (कोभिड–१९) को उपचार परीक्षण गर्ने भएको छ । निको भइसकेका संक्रमितको रगतबाट यस्तो उपचारको परीक्षण गर्न लागिएको हो ।
बेलायतको एनएचएसको रक्त तथा प्रत्यारोपण विभागले यही प्रयोजनका लागि कोभिड–१९ बाट निको भएका मानिसहरुलाई रक्तदान गर्न आग्रह गरेको छ ।
वैज्ञानिकहरुले ठीक भएका मानिसको शरीरमा विकास हुने एन्टिबडीले कोरोना भाइरससँग लड्न सक्ने अपेक्षा गरेका छन् । अमेरिकामा यस्तै ठूलो प्रोजेक्ट शुरु भइसकेको छ । यसका लागि अहिले अमेरिकामा एक हजार पाँच सय अस्पतालले मिलेर काम गरिरहेका छन् ।
कोरोना भाइरसबाट अहिलेसम्म बेलायतमा १६ हजारभन्दा धेरै मानिसको मृत्यु भइसकेको छ भने एक लाख २० हजारभन्दा धेरै मानिस संक्रमित भइसकेका छन् ।
स्रोत :बीबीसी
