१२ जेठ, काठमाडौं । भारतीय सत्तारुढ दल भारतीय जनता पार्टी (बीजेपी)का महासचिव राम माधवले नेपाल र भारतबीच जारी सीमासम्बन्धी विवाद संवादको माध्यमबाटै हल हुने बताएका छन् । एक टेलिभिजनसँगको अन्तर्वार्तामा उनले दुई देशबीच सुल्झाउनुपर्ने केही मुद्दाहरू रहेको भन्दै अहिले दुई देशबीच सम्बन्ध खराब नभइसकेको दाबी गरेका छन् ।
आजतक टेलिभिजनका प्रस्तोताले उनलाई प्रश्न गरेका थिए- नेपालका प्रधानमन्त्री केपी शर्मा ओलीले भारतविरुद्ध खतरनाक ढंगले आवाज उठाइरहेका छन् । नेपालको संसदले पनि भारतविरुद्ध संकल्प प्रस्ताव पारित गर्ने तयारी गरेको छ । यसलाई कसरी हेर्नुभएको छ ?
राम माधवले जवाफ दिए- केही हप्तायता नेपालमा भएको विकासक्रम अत्यन्त दुर्भाग्यपूर्ण छ । नेपाल र भारतबीचको सम्बन्ध दुई सरकारबीच मात्रै होइन, जनस्तरसम्म छ । हाम्रो सभ्यता, संस्कृति एउटै हो । त्यसैले सूक्ष्म तहमा कसैले पनि यो सम्बन्धलाई भत्काउन सक्दैन । यो सम्बन्ध कायम रहन्छ तर मुद्दाहरू त सधैं चलिरहन्छन् ।’
उनी अगाडि थप्छन्, ‘हाम्रो विदेश मन्त्रालयले कडारुपमा भनेको छ कि (नेपालको कदममा) प्रोत्साहन अन्यत्र कतैबाट आइरहेको छ । म भन्छु नेपाली नेतृत्वले अल्पकालीन राजनीतिक लाभको हिसाबले होइन, दीर्घकालीन हिसाबले सोच्नुपर्छ ।’
नेपाल र भारतबीच महाकाली नदीको उद्गमस्थलबारे विवाद रहेको उनले बताए । तर, नेपालले नयाँ नक्सा निकाल्ने हदसम्म जानुले आफूहरूलाई आश्चर्यमा पारेको उनको टिप्पणी छ ।
राम माधवले भने, ‘(नेपालको नयाँ नक्साले) भारतको सार्वभौमिकतामा गम्भीर प्रश्न उठाएको छ। भारतलाई असहज स्थितिमा पुर्याएको छ । अब यसलाई संवादबाट सुल्झाउनुपर्छ ।’
नेपाल र भारतबीच संवाद अत्यन्त सहज रहेको उनले बताए। त्यसपछि उनलाई सोधिएको थियो, ‘नेपाल भारतको पोल्टाबाट फुस्केर चीनको पोल्टामा पुगेकोमा तपाईंहरूलाई कुनै खेद छ ?’
राम माधवले भने, ‘होइन, हाम्रो सम्बन्ध समाप्त भएको अवस्था छैन । सम्बन्धमा अप र डाउन हुन्छ । अहिले खराब समय हो । तर, मोदी नेतृत्वको सरकारले नै यो हल गर्छ ।’
