१९ जेठ, लहान । हावाहुरीले सिराहा नगरपालिका-८ स्थित दलितबस्तीका एकै परिवारको दुई घर भत्किँदा चारजना घाइते भएका छन् ।
वर्षासँगै चलेको हावाहुरीले घर भत्किँदा स्थानीय बुधावा सदायकी ४५ वर्षीया श्रीमती फुनियाँदेवी, १४ वर्षीया छोरी, ११ र आठ वर्षीय दुई छोरा घाइते भएको वडाध्यक्ष नागेश्वर गोइतले जानकारी दिए । चारै जनाको स्थानीय क्लिनिकमा उपचार भइरहेको छ ।
ती परिवारलाई तत्काल खानेबस्ने व्यवस्था मिलाउने कार्य भइरहेको उनले बताए।
चट्याङले अस्पतालमा १० लाख बढीको क्षति
यस्तै वर्षासँगै सोमबार परेको चट्याङ लागेर लहानस्थित रामकुमार उमा स्मारक अस्पतालमा करिब १० लाखभन्दा बढीको क्षति भएको छ।
अस्पतालको छतमा रहेको सीसी क्यामेरा र इन्टरनेट वाइफाईको राउटर जल्नाका साथै चार थान कम्प्युटर, इन्भटर तथा एक्सरे मेसिनमा क्षति पुगेको अस्पतालका मेसु डा. सुनिलकुमार कुशवाहाले जानकारी दिए । अस्पतालको प्रशासनिक कार्य प्रभावित भएको उनले बताए।
