४ असार, काठमाडौं । अन्तर्राष्ट्रिय बजारमा कच्चा पेट्रोलियम पदार्थको मूल्यमा भारी गिरावट आएको छ । नेपाल राष्ट्र बैंकले १० महिनाको तथ्यांकमा आधारित रिपोर्ट सार्वजनिक गर्दै कच्चा पेट्रोलियम पदार्थको मूल्यमा ६१.५ प्रतिशतको गिरावट आएको जानकारी दिएको हो ।
२०७६ बैशाख मसान्तमा प्रति ब्यारल अमेरिकी डलर ७२.५३ रहेको कच्चा पेट्रोलियम पदार्थको मूल्य २०७७ बैशाख मसान्तमा ६१.५ प्रतिशतले घटी प्रति ब्यारल अमेरिकी डलर २७.८९ कायम रहेको राष्ट्र बैंकले बताएको छ ।
उता सूनको मूल्य भने बढेको छ । अन्तर्राष्ट्रिय बजारमा २०७६ बैशाख मसान्तमा प्रति आउन्स सुनको मूल्य अमेरिकी डलर १२९८.४० रहेकोमा २०७७ बैशाख मसान्तमा ३१.६ प्रतिशतले वृद्धि भई अमेरिकी डलर १७०८.४ पुगेको राष्ट्र बैंकले बताएको छ ।
यसैबीच २०७६ असार मसान्तको तुलनामा २०७७ बैशाख मसान्तमा अमेरिकी डलरसँग नेपाली रुपैयाँ ९.२५ प्रतिशतले अवमूल्यन भएको छ ।
अघिल्लो वर्षको सोही अवधिमा नेपाली रुपैयाँ २.९ प्रतिशतले अवमूल्यन भएको थियो । २०७७ बैशाख मसान्तमा अमेरिकी डलर एकको खरिद विनिमय दर १२०.५१ रुपैयाँ पुगेको छ ।
२०७६ असार मसान्तमा उक्त विनिमय दर १०९.३६ रुपैयाँ रहेको थियो ।