५ असार, काठमाडौं । त्रिभुवन विश्वविद्यालयले चिकित्साशास्त्र अध्ययन संस्थानको डीनलगायत विभिन्न निकायहरूमा गरेको नयाँ नियुक्तिप्रति त्रिभुवन विश्वविद्यालय प्राध्यापक संघले आपत्ति जनाएको छ । सरकारले वरीयता मिचेर गरेको नियुक्तिले विश्वविद्यालयको गरिमामा आँच पुर्याएको भन्दै आपत्ति जनाएको हो ।
बुधबार त्रिभुवन विश्वविद्यालयको कार्यकारिणी परिषद्ले संस्थानको डीनमा वरीयता मिचेर डा दिव्या सिंह शाहलाई नियुक्त गरेको थियो । सो नियुक्तिबारे विरोध भइरहेको छ ।
शुक्रबार संघका सभापति डा वसन्त ढकाल र महासचिव केशवप्रसाद शर्माद्वारा संयुक्त रुपमा जारी विज्ञप्तिमा सो नियुक्तिप्रति ध्यानाकर्षण जनाइएको छ ।
संघले सो नियुक्तिले प्राध्यापक संघ र पदाधिकारीहरूबीच भएका बैठक तथा सम्वादहरूमा पटकपटक वरिष्ठता र पूर्ण कार्यकालको मापदण्डलाई कडाइका साथ लागु गरिनेछ भन्ने सहमतिको उल्लङ्घन भएको आरोप लगाएको छ ।
संघद्वारा जारी विज्ञप्तिमा यस्ता खालका गम्भीर त्रुटिले निरन्तरता पाउँदै जाने हो भने विश्वविद्यालयको गरिमा र यसभित्र कार्यरत प्राध्यापकहरूको मनोबल घट्न गई प्राध्यापन क्षेत्रकै मानमर्दन हुन सक्ने चेतावनी समेत संघले दिएको छ ।
