८ असार, गुल्मी । गुल्मीमा थप ४४ जनामा कोरोना संक्रमण पुष्टि भएको छ । राष्ट्रिय जनस्वास्थय प्रयोगशाला टेकु, काठमाडौं र प्रदेशिक प्रयोगशाला रुपन्देहीमा गरिएको परीक्षणमा गुल्मीमा सोमबार ४४ जनामा संक्रमण पुष्टि भएको हो ।
संक्रमित हुनेमा मालिका गाउँपालिकाका ९, इस्मा गाउँपालिकाका ३२, मुसिकोट नगरपालिकाका १ र रुरुक्षेत्र गाउँपालिकाका २ जना गरी कुल ४४ जनामा कोरोना संक्रमण पुष्टि भएको जिल्ला स्वास्थ्य कार्यालय गुल्मीका सूचना अधिकारी पशुपति आचार्यले बताए । यससँगै गुल्मीमा संक्रमितको संख्या २३७ पुगेको छ ।
भारतबाट आएर क्वारेन्टिनमा बसेकाहरुमा कोरोना संक्रमण पुष्टि भएको आचार्यले बताए । संक्रमितमध्ये २० जना डिस्चार्ज भएर घर फर्किसकेका छन् ।
