१२ असार, काठमाडौं । सरकारले कोरोना संक्रमण परीक्षणका लागि नेपालभर १० वटा प्रयोगशाला थप गरेको छ ।
असार १० गते बसेको स्वास्थ्य तथा जनसंख्या मन्त्री भानुभक्त ढकालसहितको बैठकले सरकारी स्तरमा सञ्चालनमा रहेका थप १० वटा ल्याबमा कोरोना परीक्षण गर्ने ल्याब सञ्चालन गर्ने निर्णय गरेको हो ।
मन्त्रालयको निर्णयअनुसार झापाको मेची अस्पताल, डडेल्धुरा अस्पताल, दैलेख अस्पताल, राष्ट्रिय आयुर्वेद अनुसन्धान तालिम केन्द्र, सशस्त्र प्रहरी अस्पतालमा अब कोरोना परीक्षण ल्याब सञ्चालन हुनेछ ।
स्वास्थ्य मन्त्रालयको इन्सिडेन्ट कमान्ड सिस्टमका संयोजक डा. गुणराज लोहनीका अनुसार पाल्पा अस्पताल, धौलागिरी अस्पताल, धनकुटा अस्पताल, वीरेन्द्र प्रहरी अस्पताल र नेपाली सेना अस्पतालमा पनि प्रयोगशाला सञ्चालन हुनेछ ।
यसअघि नेपालभर सरकारी २३ वटा प्रयोगशालामा कोरोना परीक्षण भइरहेकामा अब थप १० वटाबाट पनि परीक्षण हुनेछ ।
२ लाख भन्दा बढीको परीक्षण
नेपालमा आरटी पीसीआर विधिबाट हालसम्म २ लाख ६ हजार २ सय ७१ जनाको कोरोना संक्रमण परीक्षण भएको छ । शुक्रबार ६ हजार ५ सय ३४ जनाको पीसीआर विधिबाट परीक्षण गरिएको र तीमध्ये ५ सय ९३ जनामा कोरोना संक्रमण पुष्टि भएको छ ।
हालसम्म ११ हजार ७ सय ५५ जनामा कोरोना संक्रमण देखिएको छ, जसमध्ये २ हजार ६ सय ९८ जना निको भएका छन् । कोरोना संक्रमणका कारण २७ जनाको मृत्यु भएको छ ।
