१२ असार, विराटनगर । विराटनगर महानगरपालिकामा शुक्रबार थप दुई जनामा संक्रमण पुष्टि भएको छ । विराटनगर-६ का ३१ वर्षीय पुरुष र २१ वर्षीय महिलामा संक्रमण पुष्टि भएको हो । उनीहरू श्रीमान् र श्रीमती रहेको पाइएको छ ।
विराटनगर महानगरका जनस्वास्थ्य महाशाखा प्रमुख रमेश कार्कीले भने, ‘संक्रमण पुष्टि भएका उनीहरू श्रीमान् र श्रीमती हुन् । दुवै जना असार ४ गते भारतको दिल्लीबाट मजदुरी गरी विराटनगर फर्किएका थिए ।’
विराटनगरस्थित मारवाडी सेवा सदनको क्वारेन्टिनमा बस्दै आएका दुवै जनाको असार ७ गते स्वाब संकलन गरिएकोमा शुक्रबार पीसीआर परीक्षणको रिपोर्ट पोजेटिभ आएको उनको भनाइ छ । योसँगै विराटनगरमा कोरोना संक्रमितको संख्या १० पुगेको छ।
