१५ असार, काठमाडौं । आज असार १५ । अन्य जिल्लाका किसानहरू जस्तै ललितपुरको खोकनाबासी पनि सोमबार बिहानै खेतमा रोपाइँ गर्न निस्किए ।
सुडोल फाँटमा खेत जोत्ने, आली लगाउने, पानी लगाउनेलगायतका काम सुरु गर्नै लाग्दा प्रहरीको टोली त्यहाँ पुग्यो र उनीहरूको काममा अवरोध गर्यो । प्रहरी र खोकनावासीबीच हाते ट्याक्टर खोसाखोस समेत भयो ।
स्थानीय कृष्ण डंगोल भन्छन्, ‘हामीले हाम्रो खेतमा खनजोत गर्दा प्रहरी आएर रोक्न खोज्यो ।’
किन रोक्यो प्रहरीले ?
सुडोल फाँट काठमाडौं–निजगढ जोड्ने फास्ट ट्र्याकमा पर्छ । सुडोल फाँटलाई हाल फास्ट ट्र्याकको ‘जिरो किलोमिटर’ भनिन्छ । सो क्षेत्रको जग्गा सरकारले अधिग्रहण गरेको छ । त्यसैले खेतीपाती गर्न प्रहरीले रोक लगाएको हो ।
