१६ असार, काठमाडौं । कोरोना भाइरसको महामारी नियन्त्रणका लागि सरकारले तीन महिना लामो लकडाउन गरेर आफूहरुका लागि राहतको प्याकेज नल्याएको ट्याक्सी व्यवसायीहरुले गुनासो गरेका छन् ।
कर पनि मिनाहा नभएको र किस्ता तिर्ने अवधि पनि थप नभएपछि आफूहरु मारमा परेको ट्याक्सी व्यवसायीको गुनासो छ । लामो लकडाउनका कारण आम्दानीको स्रोत पनि बन्द भएपछि दैनिक छाक टार्न पनि समस्या भएको भन्दै व्यवसायीले शान्तिपूर्ण प्रदर्शन थालेका छन् ।
सरकारले ट्याक्सी व्यवसायीको पक्षमा कुनै कदम नचाले ट्याक्सीको चाबी यातायात व्यवस्था विभागलाई बुझाउने व्यवसायी दीपक केसीले अनलाइनखबरलाई बताए ।
मंगलबार प्रदर्शनका क्रममा रहेको उनले बानेश्वरमा अनलाइनखबरसँग गरेको कुराकानीको सम्पादित अंश –
सरकारले लकडाउन गरेको तीन महिना भइसक्यो । अहिले लकडाउन सार्वजनिक यातायातलाई मात्र लागेको छ । सवारीसाधन हुने व्यक्ति निर्वाध रुपमा हिँडिरहेका छन् । सामान्य नागरिकलाई लकडाउन छ ।
ट्याक्सी पनि निजी कार जस्तै हो । संक्रमणको कुरा गर्ने हो भने निजी गाडीमा हिँड्नेलाई कोरोना हुने र ट्याक्सीमा हिँड्नेलाई नहुने भन्ने होइन । त्यसैले व्यस्थित तरिकाले पछाडि दुई जना राखेर ट्याक्सी चलाउन पाउनु पर्छ भन्ने हाम्रो माग हो ।
स्यानिटाइजर, मास्कसहित पछाडि दुई जना मात्र राखेर उपत्यकाभित्र कुदाउन पाऊँ भनेर हामीले सरकारलाई ज्ञापन पत्र पनि बुझाएका थियौं । सोमबार रातिको मन्त्रिपरिषद बैठकबाट मोडालिटी फेरिएला भन्ने थियो । तर, कुनै नयाँ निर्णय आएन ।
बरु सात दिन पुनः उस्तै गरी लडकाउन भन्ने भनियो । अहिले हाम्रा बालबालिका प्रताडित छन् । घरमा खाने चिज छैन । बालबालिका भोकभोकै छ । गाडी सडकमा निकाले दिनभर राखिदिन्छ । अर्को समस्या हुन्छ । गाडीबाहेक आम्दानीको अर्को स्रोत छैन ।
कतिपय आत्महत्या गर्ने अवस्थामा पुगिसकेका छौं । रोग, भोक र तनावले मानसिक सन्तुलन गुम्ने स्थिति आइसक्यो । आज कमाएर बेलुका बाँच्नु पर्ने मान्छेलाई राज्यले अलिकति पनि सहयोग गरेको छैन ।
कसरी बाँच्ने होला ? राज्यले हामीलाई बुझेन । राज्य ट्याक्सी व्यवसायीप्रति संवेदनशील भएन । निजी गाडीले महँगो भाडामा यात्रु बोकिरहेका छन् । एम्बुलेन्सले बोकेका छन् । तर, आम नागरिकले चाहिँ सेवा पाएका छैनन् । अर्कोतिर मजदुर र व्यवसायीको स्थिति पनि नाजुक छ ।
गाडी, घर, जग्गा बैंकले लिलाम गर्ने भो । बोलाएको बोलाइ छ । यस्तो अवस्थामा रोगलाई बिर्सिएर हामी सडकमा निस्किनुको विकल्प थिएन । सरकारले हाम्रो समस्या बुझिदियोस् ।
याे पनि पढ्नुस्
भोकले मर्ने भइयो भन्दै प्रदर्शनमा उत्रिए ट्याक्सी व्यवसायी
लकडाउनविरुद्ध प्रदर्शनमा निस्किएका तीन सय ट्याक्सी नियन्त्रणमा
