गायिका सोफिया थापाले गाएको ‘तीज गीत’ विवादमा परेपछि हाइलाइट्स नेपालले आफ्नो च्यानलबाट हेर्न नमिल्ने बनाएको छ । विभिन्न संघ–संस्थाबाट दवाव आएको भन्दै कम्पनीले यसलाई अरुले हेर्न नमिल्ने गरी ‘प्राइभेट’ मा राखेको हो ।

‘यसपालीको तीज, नो व्रत प्लिज’ बोलको गीतललाई ‘तीजविरोधी’ भन्दै आलोचना भएको थियो । गीतका शब्दहरुले नेपालको पवित्र चाड र हिन्दू महिलाहरुको आस्थामा चोट् पुर्याएको भनेर विभिन्न संघ–संस्थाहरुले यसलाई हटाउन आग्रह गरेका थिए । हाइलाइट्स नेपालमा केही हिन्दूवादी संस्थाले पत्रसमेत पठाएका थिए ।

यो गीत सोफिया स्वयंले लेखेकी हुन् । उनले अनलाइनखबरसँग प्रतिक्रिया दिँदै आफू गीत हटाउने पक्षमा नरहेको बताइन् ।

‘म त हटाउनु हुँदैन भन्नेमा थिएँ । तर केही संस्थाहरुले लगातार धम्की दिएका रहेछन् । त्यसैले प्राइभेट गर्न बाध्य हुनुभयो,’ उनले भनिन् ।

हाइलाइट्स नेपालको च्यानलबाट हटे पनि अन्य थुप्रै च्यानलहरुले यसलाई कपी गरेर हालिसकेकाले दुख नलागेको थापाको भनाइ छ ।

‘मेरो उद्देश्य पैसा कमाउने होइन, दर्शकमाझ सन्देश पुगोस भन्ने हो । मैले आफ्नो सोखको लागि मात्रै गाएको हुँ । अन्य च्यानलमा दर्शकले गीत अझै हेर्न पाउनुहुन्छ । अब यो पब्लिक प्रपर्टी बनेको छ । त्यसैले म दुखी छैन,’ उनले भनिन् ।

आफ्नो गीत बौद्धिक समुहमा बहसको विषय बनेको भन्दै उनले सन्तुष्टि व्यक्त गरिन् ।

यो पनि पढ्नुहोस सोफिया भन्छिन्ः मेरो गीतको विरोध पुरुषले मात्र गरेका छन्

यो पनि पढ्नुहोस तिज गीतलाई लिएर धम्की आएको भन्दै सोफियाले प्रहरीमा दिइन् उजुरी

यो पनि पढ्नुहोस व्रत नबस्न आग्रह गर्दै सोफियाले गाएको ‘तिज गीत’ विवादमा