कोरोनाबाट ५२औं मृत्यु : विरामी भएर भारतबाट आएको पत्तै भएन

सांकेतिक तस्वीर

१४ साउन, विराटनगर । बीपी कोइराला स्वास्थ्य विज्ञान प्रतिष्ठान, धरानमा उपचारका क्रममा ज्यान गुमाएका कोभिड-१९ संक्रमित केही दिन अघि भारतबाट आएको खुलेको छ ।

कोरोना सक्रमण पुष्टि भएपछि कोशी अस्पताल विराटनगरले गम्भिर अवस्थाका मोरङ सुनबर्सी नगरपालिका- ८ सिक्टीका ४५ वर्षीय पुरुषलाई धरान रिफर गरिएको थियो । दिउँसो धरान पुगेका पुरुषको बेलुका पौने ५ बजे मृत्यु भएको प्रतिष्ठानका प्रवक्ता डाक्टर निदेश सापकोटाले जानकारी दिएका छन् ।

यससँगै नेपालमा कोरोना भाइरसको संक्रमणबाट मृत्यु हुनेको संख्या ५२ पुगेको छ ।

पहिलो आउँदा क्वारेन्टाइन, दोस्रो पटक सिधै घर

सुनबर्सी नगरपालिका मेयर कालिप्रसाद दासकाअनुसार मृतक पुरुषको ससुराली घर भारतको बिहारमा पर्छ । उनी हालै भारतबाट विरामी अवस्थामा घर फर्किएका थिए । तर उनी भारतबाट आएर घरमा बसेको जानकारी स्थानीय प्रशासनले नपाएको दासले बताए ।

दुई महिना अघि भारतबाट फर्किदा क्वारेन्टिनमा बसेका उनी दोस्रो पटक र्फकदा भने कसैले जानकारी पाएका थिएन् । ‘७-८ दिन अघि भारतबाट आएका रहेछन्’ जिल्ला प्रहरी कार्यालय मोरङका प्रहरी उपरीक्षक सन्तोष खड्काले भने ।

स्वास्थ्यमा गम्भिर समस्या भएपछि मंगलबार कोशी अस्पताल, विराटनगर आएका थिए । ‘फिबर क्लिनिक आएपछि आइसोलेसनमा भर्ना गरेर स्वाब संकलन गर्न लगाएको थियो’ अस्पतालका सिनियर फिजिसिन डाक्टर दीपक सिग्देलले भने ‘विरामीको अवस्था गम्भिर थियो, रिपोर्ट पोजेटिभ आएले धरान रिफर गरिएको हो ।’