Comments Add Comment

कर्णाली प्रदेशको स्थापना दिवस : भूगोल पाइयो, तर सपना अधुरै

४ भदौ, सुर्खेत । २०७२ साउन २३ गतेदेखि अखण्ड मध्यपश्चिम प्रदेशको माग गर्दै वीरेन्द्रनगरमा सुरु भएको आन्दोलनपछि भदौ ४ गते तत्कालिन राजनीतिक दलले मध्यपश्चिमका जिल्ला समेटेर छुट्टै प्रदेश बनाउने सहमति गरे ।

पछि सोही सहमतिअनुसार संविधानमा ७ प्रदेश रहने र साविक कर्णाली अञ्चलका पाँच, भेरीका तीन र राप्तीका दुइ जिल्ला समेटेर ६ नम्बर प्रदेशको व्यवस्था भयो । जसलाई प्रदेशसभाको पहिलो अधिवेशनले ‘कर्णाली प्रदेश’ नामकरण गरिसकेको छ ।

प्रदेश स्थापनाका लागि भएको आन्दोलन सफल भएको दिनको सम्झनामा प्रदेश सरकारले भदौ ४ गतेलाई प्रदेश स्थापना दिवस तथा शहीद दिवसको रुपमा मनाउने गरेको छ । बिहीबार कर्णाली प्रदेशमा सार्वजनिक विदा पनि दिइएको छ ।

अखण्ड मध्यपश्चिमको माग गर्दै भएको उक्त आन्दोलनमा सुर्खेतका यामबहादुर बिसी, टीकाराम गौतम, गोपालसिंह रजवार र जुम्लाका हरिबहादुर कुँवरले ज्यान गुमाएका थिए ।

कोरोना महामारीका कारण शहीद दिवस तथा प्रदेश स्थापना दिवस सामान्य ढंगले मनाइयो । कर्णालीका मुख्यमन्त्री महेन्द्रबहादुर शाहीले बिहीबार शहीद दिवसका अवसरमा आयोजित कार्यक्रममा शहीदको सपना पूरा गर्न प्रदेश सरकार प्रतिवद्ध रहेको बताए । उनले भने, ‘कोरोनाको महामारीले गर्दा ऐतिहासिक दिनलाई हर्षोल्लासका साथ मनाउन भने सकिएन ।’

शहीद परिवारको गुनासो

प्रदेश सरकार गठन भएको साढे २ बर्ष भइसक्दा पनि आफूहरुको माग पूरा नभएको शहीद परिवारको गुनासो छ । प्रदेश सरकारले भदौ ४ लाई प्रदेश स्थापना दिवसका रूपमा मनाउने निर्णय गरेपनि शहीदको सम्मान नगरेको शहीद यामबहादुर बिसीकी बहिनी भगवती बिसी बताउँछिन् ।

‘आन्दोलनमा हामीले आफन्त गुमायौं तर कर्णाली सरकारले शहीदको सम्मान गर्न सकेन,’ उनले भनिन, ‘शहीद गेट, शालिक निर्माण, शहीदको नाममा चोकहरुको नामाकरण र परिवारलाई रोजगारी दिने मागहरु अझै सम्बोधन भएको छैन ।’

आन्दोलनबाट प्रदेश प्राप्ति भए पनि समृद्ध कर्णालीको सपना भने अधुरै रहेको आन्दोलनमा भाइ गुमाएका जुम्लाका राजबहादुर कुँवरले बताए । ‘शहीदको रगतले भूगोल प्राप्ति भयो तर समृद्धिको सपना अधुरै छ’ उनले भने ।

फेरिएन जीवनस्तर

शासकीय संरचनाको विभाजन भए पनि नागरिकको जीवनशैलीमा भने कुनै पनि परिवर्तन आउँन नगकेको आन्दोलनमा सहभागी अगुवाहरु बताउँछन् ।

‘आधारभूत आवश्यकताकै लागि नागरिक छट्पटिनुपर्ने विद्यमान अवस्था रहेसम्म बदलिएको शासकीय संरचनामा गर्व गर्न सकिँदैन’ आन्दोलनमा सहभागी अगुवा प्रचण्ड पोखरेल बताउँछन् ।

प्रदेश सरकारले जनभावना अनुसार काम गर्न नसकेको तत्कालिन अखण्ड मध्यपश्चिम आन्दोलन नागरिक संघर्ष समितिका संयोजक तेजबिक्रम वस्नेतले बताए ।

‘प्रदेश प्राप्तिका लागि नागरिकले ज्यान गुमाए, तर प्रदेश सरकारले जनभावना अनुसार काम गर्न सकेन’ उनले भने, ‘आन्दोलन प्रदेश प्राप्तिका लागि मात्र नभई जनताको जीवनस्थर बदल्न थियो ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment