१९ भदौ, सप्तरी । राजविराजस्थित सप्तरी कारागारका ६ जना कैदीबन्दी र दुईजना प्रहरीमा कोरोना संक्रमण पुष्टि भएको छ ।
केही दिनयता ज्वरो तथा श्वासप्रश्वासमा समस्या देखिएका कैदीबन्दीको स्वाब परीक्षण गराउँदा पोजेटिभ देखिएको कारागारका निमित्त प्रमुख संजय रामले बताए ।
५६, २६, २२ र दुई जना ३१ वर्षका तथा एकजना उमेर खुल्न नसकेका पुरुष कैदीबन्दीमा कोरोना संक्रमण देखिएको हो ।
संक्रमित देखिएका दुईजना प्रहरीको भने उमेर खुल्न नसकेको स्वास्थ्य कार्यालयले जनाएको छ ।
संक्रमण देखिएका उनीहरुलाई छुट्टै कोठामा राखिएको छ । कारागारभित्र कोरोना संक्रमण देखिएपछि अन्य कैदी बन्दीको पनि स्वाब संकलन गरिने जिल्ला स्वास्थ्य कार्यालयका निमित्त प्रमुख दुनियाँलाल यादवले बताए ।
१२५ जना क्षमता रहेको सप्तरी कारागारमा अहिले ३३३ जना कैदीबन्दी रहेका छन् । यसमध्ये १५ जना महिला छन् ।
