२४ भदौ, काठमाडौं । अफगानिस्तानको राजधानी सहर काबुलमा उपराष्ट्रपतिलाई लक्षित गरी बम विष्फोट गराइएको छ । उपराष्ट्रपति अमरुल्लाह सलेहलाई लक्षित गरी गराइएको उक्त विष्फोटमा परी कम्तीमा १० जनाको मृत्यु भएको छ । अफगानिस्तानको गुप्तचर संस्थाको प्रमुख बनिसकेका सलेहले आफू उक्त आक्रमणबाट बचेको र आफ्नो अनुहार तथा हातमा सामान्य चोट लागेको बताएका छन् ।
अहिले तालिबान र सरकारको बीचमा वार्ताको तयारी भइरहेको समयमा यो विष्फोट गराइएको हो । सलेह अफगानिस्तानमा तालिबानको विरोधीको रुपमा रहँदै आएका छन् । सलेह यसअघि भएका विभिन्न हत्याको प्रयासबाट पनि बच्दै आएका छन् । गत वर्ष पनि उनको हत्या गर्ने प्रयासले गरिएको आक्रमणमा उनको कार्यालयको २० जनाको मृत्यु भएको थियो ।
यद्यपि तालिबानका प्रवक्ता जबिहुल्लाह मुजाहिदले यो आक्रमणमा संगठनको कुनै संलग्नता नरहेको बताएका छन् । अफगानिस्तानको आन्तरिक मन्त्रलयका प्रवक्ता तरेक अरेनले सलेह कामको लागि बाहिर निस्किँदै गर्दा उनलाई लक्षित गरी विष्फोट गराइएको र यो आक्रमणमा १० जनाको मृत्यु हुनुका साथै उनका बडिगार्डसहित १५ जना मानिसहरु घाइते भएको जनकारी दिएका छन् ।
विष्फोटपछि बोल्दै उपराष्ट्रपति सलेहले आफ्नो राजनीतिक काम जारी राख्ने बताएका छन् । अफगानिस्तानका राष्ट्रपति असरफ घानीले आक्रमणको भर्त्सना गरेका छन् । उनले आतंकवादीहरु र उनीहरुका विदेशी सहयोगीले मानिसहरुमा रहेको शान्ति, प्रजातन्त्र र मुलुकको उज्वल भविष्यप्रतिको अस्था हटाउन नसक्ने बताएका छन् ।
कतारको राजधानी दोहामा अफगानिस्तानका अधिकारीहरु र तालिबानको बीचमा केही दिनमा वार्ता सुरु हुने अपेक्षा गरिएको छ । गत फेब्रुअरीमा अमेरिका र तालिबानबीच १८ वर्षे युद्धविरामको लागि शान्ति सम्झौता भएको थियो । यो सम्झौतापछि तालिबानले अमेरिकी सेनामाथिको आक्रमण बन्द गरेको भए पनि अफगानी सेना र सरकारमाथिको आक्रमण भने निरन्तर कायम राखेको छ ।
स्रोत : बीबीसी
