३ असोज कैलाली । सञ्चारकर्मी निर्मला पहराईको हत्या भएको परिवारका सदस्यहरुले बताएका छन् ।
कैलालीको घोडाघोडी नगरपालिका-१ सुखडमा रहेको कैलाली एफ.एममा कार्यरत २२ बर्षीया पहराई ३१ भदौबाट सम्पर्कविहीन भएकी थिइन् ।
शुक्रबार हराएको घोडाघोडी-१०को फूलबारी सामुदायिक वनमा उनको शव झुन्डिएको अवस्थामा भेटिएको छ । उनको हत्या गरी झुण्ड्याएको उनका दाजु विशालले दाबी गरे ।
शनिबार धनगढीमा पत्रकार सम्मेलन गरी उनले भनेका छन्, ‘त्यो आत्महत्या होइन, हत्या हो । बैनीको हत्या गर्नेलाई कडा कारबाही हुनुपर्छ ।’
सञ्चारकर्मी पहराईको शव पोस्टमार्टमको लागि सेती प्रादेशिक अस्पतालमा ल्याइएको छ भने प्रहरीले स्थानीय ललित जाग्रीलाई नियन्त्रणमा लिएको छ ।
तर घटनाको छानबिन नभएसम्म पोस्टमार्टम गर्न नदिने मृतकका दाजुले बताएका छन् ।
