वर्ष सन् २०२० को अन्तिम महिना अर्थात् डिसेम्बर चलिरहँदा विश्वको सबैभन्दा ठूलो सोसल मिडिया कम्पनी फेसबुकले वर्षभरमा फेसबुक प्लाटर्फममा सर्वाधिक चर्चित रहेका विषयहरुको सूची सार्वजनिक गरेको छ ।
हरेक वर्ष फेसबुकले आफ्नो प्लाटर्फममा सबैभन्दा छाउन सफल विषयवस्तुहरुको आँकडा सार्वजनिक गर्दछ । त्यही क्रममा फेसबुकले सन् २०२० को समीक्षालाई facebook 2020 Year in Review’ को रुपमा प्रस्तुत गरेको छ ।
यसमा मुख्यरुपमा फेसबुकमा मानिसहरुले छलफल तथा चर्चा गरेका लोकप्रिय मुद्दाहरु रहने गरेका छन् ।
फेसबुकले २०२० का शीर्ष घटनाहरुलाई विभिन्न ६ विधामा बाँडेको छ । कम्पनीका अनुसार वर्ष सन् २०२० सधैँका लागि यसकारण चिनिनेछ किनकी यो वर्षले सबै कुरा परिवर्तन गरिदिएको छ । वर्षका सर्वाधिक चर्चित ६ विधाका घटना यस्ता छन्ः
व्यक्तित्व
सन् २०२० मा फेसबुकमा सर्वाधिक चर्चा गरिएका व्यक्तिमा अमेरिकी बास्केटबल खेलाडि कोबे ब्राएन्ट रहे । ब्राएन्टको सन् २०२० को जनवरी महिनामा हेलिकप्टर दुर्घटनामा मृत्यु भएको हो ।
सामाजिक सचेतना
कालोजातिका अमेरिकी नागरिक जर्ज फ्लएडको प्रहरी कारबाहीमा मृत्यु भएको घटनाले अमेरिकामा निकै तहल्का मच्चायो । उक्त घटनापछि अमेरिकामा ब्लाक लाइफ म्याटर्स नामक अभियान नै चल्यो भने सोसल मिडियामा सो ह्यासट्याग निके भाइरल बन्यो । उक्त समयमा फेसबुकमा हरेक दिन उक्त ह्यासट्यागमा झण्डै ७५ लाख पोष्ट गरिए ।
कोभिड १९
कोरोना भाइरस महामारी सन् २०२० को सर्वाधिक चर्चाको विषय भएको कुरामा दुईमत छैन । महामारीले अझै पनि संसारलाई तहसनहस बनाइरहेको छ । उक्त विषयमा गत मार्च महिनामा #aplausosanitatio नामक ह्यासट्याग स्पेनमा निकै चर्चित भयो । स्वास्थ्यकर्मीहरुको सम्मानमा स्पेनीहरुले उक्त ह्यासट्याग सहित फेसबुकमा दैनिक १५ लाखभन्दा धेरै पोष्ट गरे । इटालीमा लकडाउनका बेला फेसबुक र इन्स्टाग्राम लाइभको संख्या दोब्बर भयो । लाखौँ मानिसहरुले क्वारेन्टाइनका बेला बार्दलीबाट फेसबुकमा लाइभ भिडियो प्रशारण गरे । अमेरिकामा फेसबुक लाइभका दर्शकको संख्यामा ५० प्रतिशतले वृद्धि भयो ।
विश्व राजनीति
फेसबुकमा यो वर्ष सर्वाधिक चर्चित विश्व राजनेताको रुपमा अमेरिकी उपराष्ट्रपतिमा निर्वाचित महिला कमला ह्यारिस रहिन् । गत अगष्ट महिनामा एक दिनमै कमला ह्यारिसलाई मेन्सन गरेर १ करोड वटा पोष्ट गरिएका थिए । फेसबुकका अनुसार अमेरिकामा लगभग सबै वयस्क व्यक्तिहरुले फेसबुक र इन्स्टाग्राममा मतदानका बारेमा जानकारी हासिल गरे ।
वातावरणीय मुद्दा
फेसबुकका अनुसार विश्वभरमा लगभग १३ लाख मानिसहरुले फेसबुकको सबैभन्दा ठूलो कोष संकलन अभियानमा भाग लिए र त्यसबाट ३ करोड ५० लाख अमेरिकी डलर संकलन गरे । उक्त रकम अस्ट्रेलियामा डढेलोबाट प्रभावित मानिस तथा जनावरहरुको संरक्षणका लागि प्रदान गरियो ।
जलवायु परिवर्तनसँग लड्न तथा समुद्रको सफाइका लागि २६ लाखभन्दा धेरै मानिसहरुले ८ करोड ७० लाख अमेरिकी डलरको कोष संकलन गरे ।
त्यसका अलावा फेथ एण्ड कम्युनिटीका साथै सर्वाधिक लोकपि्रय पप संगीतको विषय पनि फेसबुकको यस वर्षको सर्वाधिक लोकप्रिय विषय बन्यो । पप संस्कृति विधाको टपटेन सूची यस्तो छ :
- Michael Jordan’s “The Last Dance” documentary
- Dave Chappelle’s Netflix special
- Cardi B and Megan Thee Stallion’s “WAP”
- Harry Styles – Golden song release
- Los Angeles Lakers win the 2020 NBA Championship
- Katy Perry announces her pregnancy via music video
- “Savage” by Megan Thee Stallion
- Shakira and Jennifer Lopez’s Super Bowl halftime performance
- Netflix’s “Tiger King”
- Andrea Bocelli’s Easter performance from Milan, Italy
एजेन्सीको सहयोगमा
