अन्तर्राष्ट्रिय ब्रान्डको नाममा कपडा उत्पादन गर्ने उद्योग कारबाहीमा

२६ पुस, वीरगञ्ज । वीरगञ्जमा एक कपडा उद्योगलाई तीन लाख जरिबाना गरिएको छ । वीरगञ्ज महानगरपालिका–६ मा सञ्चालित एसआर रेडिमेड उद्योगलाई तीन लाख जरिबाना गरिएको हो ।

उद्योगलाई जरिबाना रकम सात दिनभित्र राष्ट्रिय वाणिज्य बैंकमा जम्मा गर्न भनिएको छ ।
पर्साका प्रमुख जिल्ला अधिकारी आस्मान तामाङ नेतृत्वको टोलीले अनुगमन गर्दा विभिन्न प्रतिष्ठित ब्रान्डको नाममा कपडा उत्पादन गर्ने गरेको पाइएपछि तीन लाख जरिबाना गरिएको थियो ।

कम्पनीले एडिडास लेखेको ट्राउजर र द नर्थ फेस लेखेको सुट उत्पादन गर्ने गरेको पाइएको छ । दुवै अन्तर्राष्ट्रिय स्तरमा नाम चलेका कम्पनी हुन् ।

उपभोक्ता संरक्षण ऐन २०७५ को दफा ३८ (ङ) बमोजिम वस्तु वा सेवाको वास्तविक गुणस्तर, बनावट आदि ढाँटी लुकाइ, झुक्याइ बिक्री गरिरहेको पाइएकोले सोही ऐनको दफा ३९ को (ख) बमोजिम तत्काल तीन लाख जरिवाना गरिएको वाणिज्य, आपूर्ति तथा उपभोक्ता संरक्षण कार्यालय पर्साका सूचना अधिकारी दीलिप खंग खत्वेले जानकारी दिए ।

प्रजिअ तामाङसहितको टोलीमा सशस्त्र प्रहरी उपरीक्षक राजेन्द्र खड्का, राष्ट्रिय अनुसन्धान कार्यालय पर्साका उपअनुसन्धान निर्देशक टीकाप्रसाद पोखरेल वाणिज्य, आपूर्ति तथा उपभोक्ता संरक्षण कार्यालय पर्साका निरीक्षण अधिकृत जितबहादुर भण्डारी लगायत सहभागी थिए ।