११ माघ, वीरगञ्ज । बारामा ट्रकको ठक्करबाट एकजना भारतीय नागरिकको मृत्यु भएको छ । भारतको जिल्ला अरबल कर्पी ग्राम पञ्चायत थाना कर्पीका २५ वर्षीय कुन्दन गुप्ताको मृत्यु भएको हो ।
वीरगञ्ज पथलैया सडकखण्ड अन्तर्गत बाराको परवानीपुर गाउँपालिका–४ चैनपुरस्थित चावासोती फ्याक्ट्रि अगाडि प्रदेश नम्बर ३ –०३००१ ख.०००९ नम्बरको ट्रकले गुप्तालाई ठक्कर दिएको थियो । उनी बीआर ०१ जीजी ९६६६ नम्बरको ट्रक चालक हुन् । चावासोती फ्याक्ट्रिका लागि धान लिएर आएका उनलाई वीरगञ्जबाट पथलैयातर्फ जाँदै गरेको ट्रकले ठक्कर दिएको थियो । ट्रकको ठक्करबाट गम्भीर घाइते भएका गुप्तालाई उद्दार गरेर उपचारका लागि बयोधा अस्पताल वीरगञ्ज लगिएकोमा उपचारको क्रममा मृत्यु भएको थियो । शव अस्पतालमै रहेको प्रहरीले जनाएको छ ।
ठक्कर दिने ट्रकका चालक बारा कोल्हबी नगरपालिका–२ हनुमानगंज टोल बस्ने ३० वर्षीय नवराज मैनालीलाई पक्राउ गरिएको जिल्ला प्रहरी कार्यालय बाराका प्रवक्ता गौतम मिश्रले जानकारी दिए ।
