सुवर्ण थापाको निर्देशनमा चलचित्र ‘दि सेक्रेट्स अफ राधा’को छायांकन सुरु गरिएको छ । यो चलचित्रको छायांकन बिहिबारबाट पालुङमा सुरु गरिएको छ । करिब दुई साता पालुङमा नै चलचित्रको छायांकन हुने निर्देशक थापाले बताए । यसपछि चलचित्रको छायांकन काठमाण्डौमा गरिनेछ ।
निर्देशक थापा र नायक सौगात मल्लको निर्माणमा यो चलचित्र बनिरहेको छ । चलचित्रमा नायिकाको रुपमा श्रृष्टी श्रेष्ठ र मेनुका प्रधान जोडिएका छन् । चलचित्रको निर्माणपक्षले नायिकाहरुको नाम भने सार्वजनिक गरेको थिएन ।
चलचित्रमा सौगात मल्ल, खगेन्द्र लामिछाने, श्रृष्टी श्रेष्ठ, मेनुका प्रधानको मुख्य भूमिका छ । चलचित्रमा नायक दयाहाङ राई र निर्देशक तथा कलाकार निश्चल बस्नेतको भने विशेष भूमिका रहेको निर्देशक थापाले जानकारी दिए ।
उनले भने–‘हामीले चलचित्रको छायांकन सुरु गरेका छौ । दर्शकले आशा गरे अनुसारको कथामा चलचित्र बनाउने तयारी हाम्रो छ ।’ सौगातको आदियोगी भिजन र सुवर्णको ब्यानरबाट यो चलचित्र बनिरहेको छ ।
