८ फागुन, काठमाडौं । कात्तिक २०७६ देखि तीन महिना ‘अकुपाई टुँडिखेल’ अभियान चल्यो । मानव साङ्गोले टुँडिखेल घेर्नेदेखि ‘जनताको डोजर’ लैजानसम्मका कार्यक्रम भए । त्यही दबावसँगै खुलामञ्च अतिक्रमण गर्ने गरी बनाइएका सटरहरुमा काठमाडौं महानगरपालिकाले ५ फागुनमा डोजर लगायो ।
त्यसयता गुमनाम जस्तै भएको ‘अकुपाई टुँडिखेल’ अभियान शुक्रबार ७ फागुनदेखि फेरि ब्यूँतिएको छ । प्रतिनिधिसभा विघटन प्रतिगमन भएको निष्कर्षसहित आन्दोलनरत वृहत नागरिक आन्दोलनले पनि शुक्रबार नै टुँडिखेल मार्च राखेको थियो ।
मार्च सुरु हुनुभन्दा केही घण्टा अगाडि ‘अकुपाई टुँडिखेल’ अभियानले खुलामञ्चमा समीक्षा कार्यक्रम र खुलामञ्चको पूर्वी गेटमा फोटो प्रदर्शनी गरेको छ । लगतै नागरिक आन्दोलन र ‘अकुपाई टुँडिखेल’ अभियानका अभियान्ताहरुले टुँडिखेल मार्च निकालेका छन् ।
यसै सन्दर्भमा ‘अकुपाई टुँडिखेल’ का संयोजक बिजय श्रेष्ठसँग गरिएको छोटो कुराकानी ः
अकुपाई टुँडिखेल अभियान फेरि सुरु भएको हो ?
हाम्रो अभियान कोभिड-१९ का कारण रोकिएको थियो । अहिले त्यसलाई निरन्तरता दिइएको मात्र हो ।
यसअघि दरबार हाईस्कुलका प्रधानाध्यापक र वीर अस्पतालका निर्देशकलाई भेटेर खुलामञ्चमा भएको सामान हटाइदिन अनुरोध गर्यौं । आजबाट अलि बृहत रुपमा निस्किएका हौं ।
प्रजातन्त्र दिवसको दिन रोज्नुको कारण ?
नेपालको हरेक राजनीतिक परिवर्तनको उद्घोष टुँडिखेलबाट भएको छ । प्रजातन्त्रको घोषणा पनि टुँडिखेलमा भएको थियो । त्यसले आजको दिनलाई विशेष दिन मानेका हौं ।
खुलामञ्चबाट शुरु गर्नको पनि आफ्नै विशेषता छ । हरेक राजनीतिकर्मीले खुलामञ्चमा भाषण गरेका छन् । धेरै आन्दोलनको शुरुवात खुलामञ्चबाट भएको इतिहास छ । राजनीतिक रुपमा स्थापित व्यत्तित्वहरुले खुलामञ्च नर्बिसिउन भनेर त्यहाँ गरेका हौं । त्यहीँबाट उनीहरुलाई झकझक्याउन खुलामञ्च रोजेका हौं ।
अकुपाई टुँडिखेल र ‘प्रतिगमन’को चाँहि के सम्बन्ध छ ?
दुबै अतिक्रमण नै हो । यद्यपि हामीले सम्बन्ध खोजेर आन्दोलन गरेको होइन । प्रतिगमनविरुद्घ आवाज उठाइरहेको नागरिक समाजले हाम्रो अभियानमा ऐक्यवद्घता जनाएको मात्र हो । यसअघि पनि उहाँहरुले साथ दिनु भएकै हो ।
अब तपाईंहरुको अभियान कसरी अगाडि बढ्छ ?
यो हाम्रो अभियान हो, आन्दोलन होइन । त्यसले यसरी नै अगाडि बढ्छ भन्ने निश्चित योजना छैन । हामी निरन्तर अभियानमा छौं । हाम्रो एउटै मात्रै माग रानीपोखरीदेखि दशरथ रंगशालासम्म जनताको सहज पहुँचमा हुनुपर्छ भन्ने हो । यहाँ अतिक्रमण गरेर निर्माण गरिएका भवनहरु भत्काइनुपर्छ, सेनाले पनि छोड्नुपर्छ । कुनै पनि वाहानामा सार्वजनिक स्थानमा जनतालाई रोक लगाइनु हुन्न । त्यो नभएसम्म अकुपाई टुँडिखेल अभियान चलाउँछौं ।
