२१ फागुन, काठमाडौं । शुक्रबार नेकपा प्रचण्ड-माधव समूहले बोलाएको संसदीय दलको बैठकले अध्यक्ष पुष्पकमल दाहाल प्रचण्डलाई संसदीय दलको नेता चयन गर्यो ।
बैठकपछि दलका नेता प्रचण्डले आफूहरुको पक्षमा ११५ जना सांसद रहेको दावी गरे ।
जबकी शुक्रबारको बैठकमा १०७ जनाले मात्र उपस्थितिमा हस्ताक्षर गरेका छन् ।
यद्यपि नेताहरु ९१ जना प्रतिनिधिसभा सदस्य र २४ जना राष्ट्रिय सभा सदस्य आफूहरुको पक्षमा रहेको दावी गरेको छ । शुक्रबारको बैठकमा कृष्णबहादुर महरा, योगेश भट्टराईसहित ७ जना उपस्थित हुन नसकेको उनीहरु बताउँछन् ।
प्रचण्ड-माधव समूहले दलको नेता चयन गरेको भोलिपल्ट शनिबार नेकपा ओली समूहले संसदीय दलको बैठक बोलाएको छ । यो समूहले कति सांसद जुटाउँछ भन्ने हेर्न बाँकी छ ।
बहुमतका लागि १११ आवश्यक
नेकपाको प्रतिनिधिसभामा १७४ र राष्ट्रिय सभामा ५० जना गरी कुल २२४ जना सांसद हुन् । उनीहरुमध्ये प्रतिनिधिसभा सदस्य सानु शिवाको निधन भएको छ र उनको ठाउँमा कोही चयन भएको छैन ।
सभामुख अग्निप्रसाद सापकोटा र राष्ट्रियसभा अध्यक्ष गणेश तिमिल्सिनाले पनि मत दिन पाउँदैनन् । त्यसैले नेकपा संसदीय दलमा २२१ जनाले मतदान गर्न पाउँछन् र बहुमत पुर्याउन १११ जना सांसद चाहिन्छ ।
बामदेव गौतम कता ?
नेकपा दुई समूहमा विभाजित हुँदा उपाध्यक्ष बामदेव गौतम कुनै पक्षतिर लागेका छैनन् । उनी राष्ट्रियसभा सदस्य छन् भने उनकी पत्नी तुलसा थापा प्रतिनिधिसभा सदस्य छिन् ।
गौतम दम्पतिजस्तै प्रतिनिधिसभा सदस्य लालबाबु पण्डित पनि कुनै पक्षमा खुलेेका छैनन् । ‘म पार्टी एक हुनुपर्छ भन्नेमा छु’ उनले अनलाइनखबरसँग भने, ‘कुनै पक्षको संसदीय दल वा बैठकमा जान्न । संसदभित्र आफ्नो भूमिका निभाउँछु ।’
नेताहरुका अनुसार संसदीय दलमा मतविभाजन हुने अवस्था आए उनीहरुको मत महत्वपूर्ण हुन्छ ।
