२२ फागुन, काठमाडौं । कञ्चनपुरको बेलौरीबाट चार ग्राम ब्राउन सुगरसहित दुईजनालाई सशस्त्र प्रहरीले पक्राउ गरेको छ ।
बेलौरी नगरपालिका-१० स्थित सीमा इलाकाबाट शनिबार सशस्त्र प्रहरीको टोलीले चार ग्राम ब्राउन सुगरसहित कञ्चनपुरको पुनर्वास नगरपालिका–१० का २५ वर्षीय रेशमान चौधरी र कैलालीको टीकापुर नगरपालिका-३ का २५ वर्षीय सन्तोष चौधरीलाई पक्राउ गरेको हो ।
उनीहरुलाई सशस्त्र प्रहरी बल, नेपाल बोर्डर आउट पोष्ट भुडाबाट खटिएको टोलीले पक्राउ गरेको सशस्त्र प्रहरी बलले जनाएको छ । से ३ प ७५९२ नम्बरको मोटरसाइकलमा भारतबाट नेपालतर्फ आउँदै गरेका उनीहरुलाई सशस्त्र प्रहरीको टोलीले शंका लागि चेकजाँच गर्दा ब्राउन सुगर फेला परेको जनाइएको छ ।
पक्राउ परेका दुवै जनालाई बरामद ब्राउन सुगरसहित आवश्यक कारबाहीका लागि प्रहरी कार्यालयमा बुझाइएको छ ।
