८ चैत, काठमाडौं । बेलायतमा एकैदिन सात लाख ११ हजारभन्दा धेरैले कोरोना भाइरस (कोभिड–१९) विरुद्धको खोप लगाएका छन् । बेलायतको स्वास्थ्य नियामकले दिएको जानकारीअनुसार शुक्रबार पहिलो र दोस्रो डोज गरी समग्रमा सात लाख ११ हजार १५६ डोज कोरोना खोप लगाइएको हो ।
बेलायती स्वास्थ्यमन्त्री माट हेन्ककले शुक्रबारको उपलब्धि बेलायतका लागि सैद्धान्तिकरुपमा ठूलो उपलब्धि भएको बताएका छन् । बेलायती प्रधानमन्त्री बोरिस जोन्सन पनि शुक्रबार कोरोनाविरुद्धको खोप लिनेमध्येका एक हुन् । अहिलेसम्म बेलायतका करिब आधा जनसंख्याले कोरोनाविरुद्धको खोप लिइसकेका छन् । अहिलेसम्म दुई करोड ६८ लाख ५२ हजारभन्दा धेरैले कोरोनाविरुद्धको खोप लिइसकेका छन् भने २१ लाख ३२ हजारभन्दा धेरैले कोरोनाविरुद्धको दुवै डोज लिइसकेका छन् ।
बेलायती स्वास्थ्यमन्त्री हेन्ककले बेलायतले एकैदिनमा कोरोनाविरुद्धको खोप अभियानमा यो सफलता पाउनु खुसीको कुरा भएको बताए । उनले यो अभियानमा सहभागी साथ र सहयोग गर्ने सबैप्रति आभार व्यक्त गरे । बेलायतमा धेरैले कोरोना खोप लगाइसकेका भए पनि सीमा खोल्न हतार गर्न नहुने वैज्ञानिकहरुले बताएका छन् । यसबाट विदेशी पर्यटकहरुले कोरोनाको नयाँ प्रकार बेलायतमा पुनः ल्याउन सक्ने उनीहरुको भनाइ छ ।
-एजेन्सीहरुको सहयोगमा
