८ चैत, काठमाडौं । सरकारले गतवर्षको भन्दा ९६ रुपैयाँ प्रति क्विन्टलले बढाएर यस वर्षको लागि गहुँको समर्थन मूल्य तोकेको छ । गत फागुन २० गते बसेको मन्त्रिपरिषद् बैठकले गहुँको सर्मथन मूल्य प्रतिक्विन्टल ३ हजार १११ रुपैयाँ तोकेको हो ।
सरकारले आर्थिक वर्ष ०७७/७८ का लागि उक्त मूल्य तोकेको सरकारका प्रवक्ता पार्वत गुरुङले जानकारी दिए । गत वर्ष गहुँको न्यूनतम सर्मथन मूल्य ३ हजार १५ रुपैयाँ थियो । कृषि तथा पशुपन्छी विकास मन्त्रालयको सिफारिसमा उद्योग वाणिज्य तथा आपूर्ति मन्त्रालयले पुनः मूल्यांकन गरेर सर्मथन मूल्य मन्त्रिपरिषदमा पठाउने गर्छ । सरकारले उखु, धान, लगायतका बालीमा समर्थन मूल्य तोक्दै आएको छ ।
यसअघि आर्थिक वर्ष ०७४/७५ मा सरकारले गहुँको न्यूनतम मूल्य प्रति क्विन्टल २ हजार ५७१ रुपैयाँ तोकेको थियो । त्यस बीचमा भने गहुँको मूल्य निर्धारण भएको थिएन ।
