२३ चैत, तनहुँ । तनहुँको शुक्लागण्डकी नगरपालिकाका सबै वडा कार्यालय भाडामुक्त बनेका छन् । चालु आर्थिक वर्षमा एकै साथ तीनवटा वडाभवन निर्माण सम्पन्न भएपछि सबै वडा भाडामुक्त बनेका हुन् ।
चालु आर्थिक वर्षमा २, ५ र ७ वडाका भवन निर्माण गरिएको हो । गत वर्ष वडा नम्बर ३, ४, ९, १० र ११ का वडा भवन निर्माण गरिएको थियो । १२ वटा वडा रहेकामध्ये १, ६, ८ र १२ नम्बर वडा साविकको गाविस भवन मर्मत सम्भार गरी सेवा प्रवाह गर्दै आएको प्रमुख प्रशासकीय अधिकृत गंगालाल सुवेदीले जानकारी दिए ।
शुक्लागण्डकी नगरपालिका–९ को नवनिर्मित वडा कार्यालय भवन सञ्चालनमा ल्याइएको छ । कुल ५१ लाख १३ हजार रुपैयाँको लागतमा तीन कोठा एक हलसहितको भवन निर्माण गरिएको हो ।
शुरुका वर्षदेखि प्रत्येक वडा भवन निर्माणका लागि भूगोल र जनसंख्याको आधारमा बजेट विनियोजन गर्दै आएको नगरपालिकाका प्रमुख किसान गुरुङले बताए ।
त्यसैगरी व्यास नगरपालिका कार्यालय मातहतमा रहेका १४ वडा कार्यालय भाडामुक्त बन्ने अन्तिम चरणमा छन् । ब्यास–१ स्थित चारकुनेमा वडा कार्यालय भवन निर्माण भइरहेकाले छिट्टै भाडामुक्त बन्ने अवस्थामा रहेको नगरपालिकाका प्रमुख प्रशासकीय अधिकृत डिल्लीराम सिग्देलले जानकारी दिए । नगरपालिकाभित्र रहेका स्वास्थ्य केन्द्र पनि भाडामुक्त अवस्थामा रहेको व्यास नगरपालिकाले जनाएको छ ।
यसैगरी आँबुखैरेनी गाउँपालिका वडाको पनि आफ्नै भवन हुने गरी ६ वटै वडाका भवन निर्माण भइरहेको गाउँपालिकाका अध्यक्ष गिरबहादुर थापाले बताए । तनहुँका बन्दिपुर, भानु, देवघाट, घिरिङ, ऋषिङ, भिमाद र म्याग्देलगायतका पालिका मातहतमा रहेका वडा तथा स्वास्थ्य केन्द्रको भवन निर्माण तीव्र रूपमा भइरहेको बताइएको छ ।
