२९ चैत, मेहन्द्रनगर । कोरोना कहरको त्रासदीका बीच भारतको विभिन्न क्षेत्रमा मजदुरीका लागि गएका सुदूरपश्चिमका वासिन्दा विशु पर्व मनाउन घर फर्किन थालेका छन् ।
भारतमा रोजगारीका लागि गएका अधिकांश व्यक्ति विशु पर्व (नयाँ वर्ष) मनाउन घर फर्किने गर्दछन् । सुदूरपश्चिम प्रदेशका पहाडी जिल्ला डडेल्धुरा, बैतडी, दार्चुला, बझाङ, डोटी, अछाम, बाजुरालगायतका जिल्लामा मौलिक तरिकाले विशु पर्व मनाउने गरिन्छ ।
नयाँ वर्षको अवसरमा सुदूरपश्चिममा भव्य रूपमा मनाइने विशु पर्वको रौनक कोरोना कहरसँगै घटेको छ । कोरोना भाइरसको सङ्क्रमण बढ्न नदिन सरकारले लकडाउन गरेपछि गत वर्ष पनि धार्मिक सांस्कृतिक वर्ष विशुको रौनक थिएन ।
यस पर्वमा विवाहित महिला माइत जाने गर्छन् । यस पर्वलाई यस क्षेत्रमा सपरिवार भेटघाट गर्ने पर्वका रूपमा समेत लिने प्रचलन रहिआएको साहित्यकार हेमबाबु लेखकले बताए ।
सुदूरपश्चिम क्षेत्रमा विशु पर्वका दिन सिस्नु लगाउने प्रचलन रहेको छ । खासगरी देवर र भाउजू तथा साली र भिनाजु एकापसमा सिस्नो लगाउने गरेको साहित्यकार लेखकको भनाइ छ । यसरी सिस्नो लगाउनाले वर्ष दिनभर कुनै पनि संकट नआउने जनविश्वास छ ।
जिल्ला स्वास्थ्य कार्यालय कञ्चनपुरका प्रमुख शिवराज सुनारले गड्डाचौकी नाका हुँदै स्वदेश फर्किनेको भीड लाग्न थालेको छ । ‘अहिले दैनिक एक हजारभन्दा बढी मानिस भारतबाट आइरहेका छन्,’ उनले भने । सुनारका अनुसार गड्डाचौकीमा सबैको स्वास्थ्य परीक्षणका साथै कोरोनासँग मेल खाने लक्षण देखिए परीक्षण गर्ने गरिएको छ ।
एक सातायता गड्डाचौकी नाकाबाट घर फर्किने २६ जना नेपालीमा कोरोना सङ्क्रमण देखिएको उनले बताए । ‘संक्रमितलाई एम्बुलेन्सबाट महाकाली अस्पताल पु¥याएर उपचार गर्ने प्रबन्ध मिलाएका छौं,’ उनले भने, ‘संक्रमित थपिँदै जाने देखिएकाले आइसोलेसन कक्ष बनाउने तयारी पनि छ ।’
गत चैत ८ गतेदेखि सीमामा स्वास्थ्य परीक्षण थालिएको उनले बताए ।
भारतमा केही दिनयता कोरोना संक्रमण उच्च दरमा बढेपछि कतिपय नेपाली कामदार स्वदेश फर्किन थालेका छन् । डडेल्धुराको पर्शुराम नगरपालिकाका वीरराम सुनारले आफू परिवारसहित विशु पर्वका लागि घर फर्किएको बताए । ‘चार महिनाअघि रोजगारीका लागि भारतको पञ्जाब गएको थिएँ,’ आइतबार बिहान घर फर्किदै गर्दा गड्डाचौकीमा भेटिएका सुनारले भने, ‘पञ्जाबमा पनि कोरोना निकै बढिरहेकाले पर्वको बहानामा घर फर्किएका हौं ।’
