९ वैशाख, विराटनगर । मोरङमा शिकार खेल्न गएका एक पुरुषको भरुवा बन्दूक पड्किएर मृत्यु भएको छ । केराबारी गाउँपालिका–३ का ३२ वर्षीय हस्त राईको भरुवा बन्दुक पड्किएर मृत्यु भएको हो ।
शिकार खेल्न साथीहरुसँग जंगल गएका राईको आफैंले बोकेको भरुवा बन्दूक पड्किएर छर्राले लागेर मृत्यु भएको प्रहरीले जनाएको छ ।
मोरङ प्रहरीका प्रवक्ता डीएसपी मानबहादुर राईका अनुसार गजेन्द्र राई र रुविन लिम्बूसँग उनी बुधबार राति शिकार खेल्न केराबारी–३ कै बाघदले जंगलमा पुगेका थिए । गजेन्द्र र रुविन आफैंले इलाका प्रहरी कार्यालय केराबारीमा आएर घटनाका बारेमा प्रहरीलाई जानकारी गराएका थिए ।
दुवै जनालाई नियन्त्रणमा लिएर घटनाका विषयमा अनुसन्धान थालेको प्रहरीले जनाएको छ ।
