१४ वैशाख, सुर्खेत । कोरोना संक्रमणबाट सुर्खेतमा थप एकजनाको मृत्यु भएको छ ।
तिला गाँउपालिका–२ जुम्लाका ७६ वर्षीय वृद्धको कोरोना संक्रमणबाट मृत्यु भएको कर्णाली प्रदेश स्वास्थ्य निर्देशनालयका सूचना अधिकारी नोदनारायण चौधरीले जानकारी दिए ।
सूचना अधिकारी चौधरीका अनुसार ती पुरुषको मंगलबार बिहान उपचारको क्रममा कर्णाली प्रदेश अस्पताल, सुर्खेतमा मृत्यु भएको हो । उनी वीरेन्द्रनगरमा बस्दै आएका थिए ।
दीर्घरोगबाट समेत ग्रसित ती पुरुष आइतबार राति प्रदेश अस्पताल कालागाउँमा भर्ना भएका थिए । सोमबार कोरोना परीक्षण गर्दा संक्रमण पुष्टि भएको निर्देशनालयले जनाएको छ ।
योसँगै कर्णालीमा कोरोना संक्रमणबाट मृत्यु हुनेको संख्या ३५ पुगेको छ ।