देशैभरी कोरोना संक्रमणको दर बढिरहेको समयमा लोकदोहोर कलाकारहरुले ‘राष्ट्रिय लोक तथा दोहोरीगीत प्रतिष्ठान’को भवनलाई आइसोलेसन वार्डको रुपमा प्रयोग गर्न सक्ने भएका छन् ।
कोरोना संक्रमणपश्चात परिवारसँग र भाडाको कोठामा बस्न समस्या हुने लोकदोहोरी कलाकारहरुले प्रतिष्ठानको भवनमा बस्न सक्ने प्रतिष्ठानकी उपाध्यक्ष रीता थापा मगरले बताइन् । यसका लागि तयारी समेत थालिएको थापाको भनाई छ ।
उनले, प्रतिष्ठानको भवनमा बस्न चाहनेका लागि बेड र खानाको व्यवस्था समेत प्रतिष्ठानले नै मिलाउने पनि बताइन् । प्रतिष्ठानको भवनमा २५ जनासम्म बस्न मिल्ने क्षमता छ । गतबर्ष पनि प्रतिष्ठानको भवनमा केही संक्रमित कलाकारहरु बसेका थिए ।
प्रतिष्ठानले रिता थापा मगरको अध्यक्षतामा कोभिड १९ आकस्मिक सहयोग समिती समेत गठन गरेको छ । उपाध्यक्ष थापा मगरले समस्यामा परेका कलाकारहरुलाई प्रतिष्ठानको सम्पर्कमा आउन आग्रह गरेकी छिन् ।