४ जेठ, काठमाडौं । कोरोना महामारी नियन्त्रणका लागि स्वीटजरल्याण्ड सरकारले नेपाललाई यसैसाता विभिन्न स्वास्थ्य सामग्री पठाउने भएको छ ।
उपप्रधानमन्त्री ईश्वर पोखरेलसँग मंगलबार भएको टेलिफोन संवादमा नेपालका लागि स्वीटजरल्याण्डकी राजदूत एलिजावेथ भन क्यापिलरले नेपाललाई अक्सिजन कन्सेन्ट्रेटर, पीपीई, मास्क र एन्टिजेन टेस्टिङ किट सहयोग गर्न लागेको जानकारी दिइन् ।
स्वास्थ्य सामाग्री बोकेको गुल्लिभ एयरको कार्गो चार्टर्ड जहाज शनिबार काठमाडौं आइपुग्ने स्वीस राजदूत क्यापिलरले जानकारी दिइन् । चार्टर्ड फ्लाइटको खर्च पनि स्वीस सरकारले नै व्यहोर्ने उपप्रधानमन्त्री पोखरेलको सचिवालयले जनाएको छ ।
उपप्रधानमन्त्री पोखरेलले नेपाल र नेपालीप्रति सद्भाव देखाएकोमा स्वीजरल्याण्ड सरकारलाई धन्यवाद दिए ।
