१८ जेठ, काठमाडौं । शुक्रराज ट्रपिकल तथा सरुवा रोग अस्पतालका निर्देशक डा. सागर राजभण्डारीले नेपालमा विभिन्न देशबाट आउँदै गरेको खोप जोखिमयुक्त एवं स्वास्थ्य सुविधामा पछि परेको समुदायलाई प्राथमिकतामा राखेर लगाउनु पर्ने सुझाव दिएका छन् ।
डा. राजभण्डारीले समयमा नै स्वास्थ्य संस्थाको पहुँचमा ल्याउन मुस्किल भएका दुर्गम क्षेत्र एवं स्वास्थ्य मापदण्डबारे जानकारी नपुगेका समुदायलाई खोप लगाउँदा प्राथमिकता दिनुपर्नेमा जोड दिएका हुन् । जाजरकोट लगायतका जिल्लामा गाउँभरि कोरोनासँग मिल्दोजुल्दो लक्षण देखिँदा पनि अस्पतालभन्दा धामीलाई देखाउन जाने गरेका समाचारहरू प्रकाशित हुने गरेका छन् ।
उनले पश्चिम नेपालको जंगली भेगमा बसोबास गर्ने राउटे, धादिङ, चितवन जस्ता जिल्लाको उत्तरी भेगमा बसोबास गर्ने चेपाङ जस्ता समुदायमा भौतिक दूरी कायम गर्ने लगायत स्वास्थ्य मापदण्ड कम पालना हुने भन्दै त्यो समुदायमा कोरोना फैलियो भने यसले समस्या जटिल बन्ने भएकोले खोप लगाउँदा उनीहरुलाई प्राथमिकता दिन आग्रह गरेका हुन् ।
‘सामाजिक दूरी कायम नहुने भएकोले उनीहरुमध्ये एउटामा कोरोना सर्यो भने सिँगै समुदायमा फैलिन सक्छ र त्यसले जटिल समस्या निम्त्याउन सक्छ’ डा. राजभण्डारीले भने ‘अब खोप दिँदा स्वास्थ्य मापदण्डप्रति त्यति चासो पनि नहुने र बिरामी भइहालेमा तत्काल अस्पताल ल्याउन पनि मुस्किल रहेका यी क्षेत्र र समुदायलाई प्राथमिकता दिनुपर्ने आवश्यकता देखिन्छ ।’
उनले अहिले आउने खोप सबैलाई दिन पर्याप्त नभएकोले ६० देखि ६४ वर्षबीचका ज्येष्ठ नागरिक र जोखिम क्षेत्र एवं समुदायलाई समेत प्राथमिकता दिनु आवश्यक देखिएको बताउँछन् । उनले सवारी चालक र निर्माण क्षेत्रमा काम गर्ने कामदारहरुलाई पनि खोपमा प्राथमिकता दिनुपर्नेमा जोड दिए ।
यो पनि पढ्नुहोस
गाउँभरिका बिरामीमा कोरोनाको लक्षण, धामी र जडीबुटीकै भर
